लहान बजार । तस्वीर: दिलिप सिंह

मोर्चाले घोषणा गरेको आमहडतालका कारण ३० साउनदेखि बन्द लहानका पसल तथा कार्यालयहरु सुचारु हुन थालेका छन् ।

घटस्थापना शुरु भएसँगै लहान बजारका पसलहरु स्वस्फूर्तरुपमा खुल्न थालेका छन् । बजार खुलेसँगै पसलहरुमा चाडपर्वमा किनमेल गर्नेहरुको भीड देखिएको छ ।

संविधानको विरोध गर्दै आमहडताल र बन्द गराइरहेका नेताहरु आफैं प्रधानमन्त्री निर्वाचनमा सहभागी भएपछि आफ्नो व्यवसायलाई सुचारु गर्न थालिएको लहानका एक व्यापारीले बताए ।

तर, तराई मधेस लोकतान्त्रिक पार्टीका सिरहा सचिव राकेश झाले मोर्चाले चाडपर्वलाई ध्यानमा राखी बन्दलाई खुकुलो पारेकाले बजार खुलेकोे बताए ।

जिल्ला उद्योग बाणिज्य संघ लहानका अध्यक्ष सुनिल महतोले बजार खुले पपिन बाहिरबाट सामान ल्याउन सहज भइनसकेको बताए । उनले भने– “पसल त खोलियो तर के बेच्ने, सामान नै छैन ।”

निराशा
आन्दोलनमा रहेका संयुक्त लोकतान्त्रिक मधेसी मोर्चाका सांसदहरु प्रधानमन्त्री निर्वाचनमा भाग लिएपछि कार्यकर्ताहरु निराश भएका छन् ।

नयाँ प्रधानमन्त्रीको निर्वाचनमा आन्दोलनमा रहेका दलका सांसदहरु सहभागी भएसँगै आन्दोलनमा स्थानीयको सहभागिता ह्वात्तै घटेको छ भने जिल्लास्तरीय नेताहरु पनि असन्तुष्ट देखिएका छन् ।

सामूहिक राजीनामा
मधेशी जनाधिकार फोरम लोकतान्त्रिकको सिरहा जिल्ला कमिटीका सवैले सामूहिक राजीनामा दिएका छन् ।

आन्दोलनमा रहेको दलका अध्यक्ष आफ्ना मागहरु पूरा नहुँदै सरकारमा गएर आन्दोलनलाई तुहाएको भन्दै उनीहरुले राजीनामा गरेका हुन् ।

पार्टीका राजनीतिक कमिटी सदस्य शत्रुधनप्रसाद सिंह कोइरी, केन्द्रीय सदस्य लक्ष्मण यादव र जिल्ला कमिटी अध्यक्ष राम चलितर साह लगायत ५१ सदस्यीय जिल्ला कमिटीका सबैले सामूहिक राजीनामा दिएका हुन् ।

कोइरीले भने, “अध्यक्ष गच्छदारले मन्त्री पदको लोभमो आन्दोलनलाई धोका दिनु भएको छ ।”

जन्जिर जुलुश प्रदर्शन

तस्वीर: दिलिप सिंह

आन्दोलनरत मधेशी मोर्चाले सिरहाको लहानमा साङ्लोमा बाँधिएर जुलुश प्रदर्शन गरेको छ ।

विभेदका विरुद्ध प्रतिकात्मक रुपमा ‘जन्जिर जुलश’ प्रदर्शन गरिएको सदभावना पार्टीका नेता बालेश्वर यादवले बताए ।

लहानको एमबी बैंक अगाडिबाट निकालिएको जुलुश बजार परिक्रमा गरी शहिद रमेश महतो चौकमा पुगेर कोण सभामा परिणत भएको थियो ।

आन्दोलनरत दलहरुले पछिल्लो एक हप्तादेखि आन्दोलनको स्वरुप परिवर्तन गरी शान्तिपूर्ण प्रदर्शन थालेका छन् ।

दिलिप सिंह, सिरहा

प्रतिकृया दिनुहोस