२०४५ सालमा रु.२५ हजार जोरजाम गरेर नारायणघाटको शहीदचोकमा खसीको मासुको तास बेच्ने भेटघाट रेस्टुरेन्ट खोलेका गोविन्द तिवारी (५०) को सम्पत्ति अहिले करीब रु.४ करोड पुगेको छ । अहिले उनको भेटघाट काठमाडौंको अनामनगरमा विस्तार भएको छ, भरतपुर सामुदायिक अस्पतालमा शेयर छ, भेटघाट सहकारी खोलेका छन् भने काठमाडौं, पोखरा, भरतपुर र नारायणघाटमा घरघडेरी जोडेका छन् ।

२०३५ सालमा कास्कीबाट रु.३ हजार लिएर जागीरका लागि चितवन झ्रेपछि किराना पसल थापेका उनले पत्नीको उपचारमा रु.७ लाख लागेपछि त्यो पसल बेच्नुपरेको थियो । तर, तास भनेर अहिले चर्चित त्यो वेलामा सबैका लागि नौलो परिकार बनाउन थालेपछि उनलाई त्यो ऋण तिर्न धेरै समय लागेन । बिरामी पत्नी र रेस्टुरेन्ट रहेको घरका धनी रामकुमार चुकेको प्रोत्साहनले उनको प्रगति अघि बढिरह्यो । नारायणघाटको बढ्दो चहलपहलले साथ दिंदा अहिलेको अवस्थामा आउन सकेको गोविन्द बताउँछन् ।
आफूले बनाएको तासको स्वादका पारखी देश–विदेशमा फैलिएको बुझ्ेका गोविन्दले भेटघाटलाई देशैभरि फैलाउने योजना बनाएका छन् । अर्काे वर्ष काठमाडौंको गैह्रीधारा र पोखरामा भेटघाट खोलेपछि बुटवलमा पनि पुर्याउने उनको योजना छ ।

तासको आम्दानीले एउटा छोरालाई एमबीए, अर्को छोरा र छोरीलाई डाक्टर पढाएका गोविन्द आफ्नो मिहिनेत र ग्राहकको मायाले सफलता पाएको बताउँछन् । व्यवसायमा उनलाई एमबीए गरेका छोराको साथ छ ।

बिहान ६ बजेदेखि बेलुका नौ बजेसम्म रेस्टुरेन्टमा खटेर तासमा राखिने मसला आफैं बनाउँछन् । ग्राहकलाई सन्तुष्टि दिन गुणस्तरमा ध्यान दिनुपर्ने बताउँदै गोविन्द भन्छन्, “मैले बनाएको तासले सम्मान र सम्पत्ति दुवै दिएको छ ।”

सविता श्रेष्ठ, चितवन

प्रतिकृया दिनुहोस