फिल्म 'चिनी कम' मा अभिनेता अमिताभ बच्चनसँग जोहरा सहगल ।

सन् २००७ मा प्रदर्शित सञ्जयलीला भंसालीको फिल्म ‘साँवरीया’ मा अन्तिम पटक अभिनय गरेकी अभिनेत्री जोहरा सहगलको २६ असार साँझ नयाँ दिल्लीमा निधन भएको भारतीय सञ्चार माध्यमहरुले जनाएका छन् ।

जोहराले पछिल्लो समयमा अमिताभ बच्चनसँगै ‘चिनी कम’ र ‘कभी खुशी कभी गम’ जस्ता फिल्महरुमा काम गरेकी थिइन् । ‘वीर–जारा’ र ‘हम दिल दे चुके सनम’ जस्ता सफल फिल्महरुमा पनि अभिनय गरेकी जोहराले ‘चिनी कम’ मा अमिताभ बच्चनकी आमाको भूमिका निर्वाह गरेकी थिइन् ।

सन २०१२ मा १०० औं जन्मदिन मनाइरहँदा जोहरा सहगललाई अमिताभ बच्चनले उनको स्फूर्ती र चञ्चल स्वभावलाई लक्षित गर्दै ‘१०० वर्षकी बालिका’ भनेका थिए । बच्चनका अनुसार जोहराले आफ्नो लामो उमेरको रहस्य सँधै सक्रिय रहनु बताउँथिन् ।

भारत सरकारबाट पद्मविभूषण सम्मान प्राप्त जोहराले सन् १९३५ मा नृत्यांगनाका रुपमा फिल्मी करियर शुरु गरेकी थिइन् । फिल्ममा चरित्र अभिनयमा माहिर उनले अंग्रेजी भाषाका फिल्महरुमा अभिनय र केही हिन्दी फिल्महरुमा कोरियोग्राफरका रुपमा पनि काम गरेकी छन् ।

प्रतिकृया दिनुहोस