पनिता ढकाल बाख्रा स्याहार्दै । तस्वीर: कृष्ण सिंजाली

एमाओवादी झापाकी नेतृ पनिता ढकालले दुई वर्षदेखि व्यावसायिकरुपमा बाख्रापालन गरिरहेकी छन् ।

युवालक्षित पशु विकास कार्यक्रम अन्तर्गत रु दुई लाख सरकारी अनुदान लिएर उनले मेचीनगर–११ स्थित पुरानो भन्सारमा ‘पूर्वोदय कृषि फार्म’ सञ्चालन गरेकी छन् । करिब ६ लाख रुपैयाँ लगानी गरेको उक्त फार्ममा यतिबेला ३० वटा खसीबाख्रा पालिएका छन् ।

उर्लाबारी र महुलीबाट रु ६ लाखमा उन्नत् जातका बाख्राका पाठापाठी खरिद गरी शुरु गरिएको बाख्रापालनमा खरी, जमुनापारी, बारबेरी, तराई उन्नत् जातका बाख्रा छन् ।

“सबै बाख्राको पशु बिमासमेत गरेकी छु” ढकालले भनिन् । बाख्रा मरेमा ९० प्रतिशत रकम बिमा कम्पनीले उपलब्ध गराउने उनले बताइन् ।
ढकालको अधिकांश समय बाख्राको स्याहार सुसारमा बित्ने गरेको छ ।

बंगुर फार्ममा प्रकाश दाहाल । तस्वीर: कमल रिमाल

२०५७ सालदेखि विद्यार्थी राजनीति शुरु गरेकी ढकाल एमाओवादी झापा जिल्ला कमिटीका पूर्व जिल्ला सदस्य र अखिल नेपाल महिला सङ्घ क्रान्तिकारी क्षेत्र नम्बर–१ की क्षेत्रीय संयोजक हुन् ।

बाख्रा पालनबाट अहिले वार्षिक रु दुई लाख आम्दानी भइरहेको उनले जानकारी दिइन् ।

भट्टराई र प्रकाश दाहाल
एमाओवादी नेता बाबुराम भट्टराइले पनि गत असोजदेखि गोरखाको खोप्लाङमा स्थानीय सहकारीमार्फत बाख्रा पालनमा सहभागी छन् ।

भट्टराईकी छोरी मानुषी अध्यक्ष रहेको दिपेश राजु स्मृति कृषि सहकारीमार्फत भट्टराई बाख्रापालनमा सहभागी भएका हुन् ।

त्यस्तै एमाओवादी अध्यक्ष पुष्पकमल दाहालका छोरा प्रकाश पनि पशुपालन व्यवसायमा सक्रिय छन् ।

उनले एकवर्षअघि काठमाडौंको आरुबारीमा बंगुर र चितवनमा गाइपालन शुरु गरेका हुन् ।

-कृष्ण सिंजाली, झापा

प्रतिकृया दिनुहोस