पूर्व प्रधानमन्त्री एवम् एमाओबादीका नेता बाबुराम भट्टराईले असार मसान्तभित्र संविधानसभाबाट नयाँ संविधान जारी हुने बताएका छन् ।

गोरखा सदरमुकाममा पत्रकारसँग कुराकानी गर्दै नेता भट्टराईले भने, “प्रमुख राजनीतिक दलहरूबीच संबिधान निर्माणको विषयमा सहमति जुटेकाले धमाधम संविधान लेखनको काम अघि बढेको छ । छुटेका विषयहरू राजनीतिक तहमै सुल्झाउने हो” उनले भने, “मस्यौदा समितिले टुङ्ग्याउने भन्ने होइन ।”

आन्दोलनकारी शक्तिहरूबीच संविधान निर्माण गर्ने सहमति भएकाले नयाँ संबिधान जारी हुने उनले प्रतिबद्धता जनाए । हल्लाको भरमा जनता लाग्न नहुने भन्दै उनले यसअघि दलहरूबीच भएको धर्मनिरपेक्षता जस्ता ठूला विषय अब परिवर्तन नहुने उल्लेख गरे ।

शक्ति बाँडफाटमा दलहरूबीच सहमति नभएको बताउँदै उनले राष्ट्रप्रमुख वा राष्ट्रपति के शब्द राख्ने भन्नेबारे बिबाद नभएको दाबी गर्दै राष्ट्रपतिको ठाउँमा राष्ट्रप्रमुख राख्दा खासै फरक नपर्ने धारणा राखे ।

“संबिधान जारी गरेर प्रधानमन्त्रीले छोड्छु भन्नुभएको छ”, उनले भने, “साउनमा राष्ट्रिय सरकार गठन हुन्छ ।”

प्रतिकृया दिनुहोस