संविधानको प्रारम्भिक मस्यौदामाथि सुझाव संकलन गर्न सिराहा पुगेका एमाओवादीका अध्यक्ष पुष्पकमल दाहाल ४५ मिनेट मात्र रहेर काठमाडौ फर्केका छन् ।

सिराहा क्षेत्र नम्बर ५ अन्तर्गत मिर्चैयास्थित मोहन उमाविमा सुझाव संकलका लागि आएका दाहाललाई मधेश केन्द्रीत दल, नेकपा–माओवादी र मातृका यादव नेतृत्वको नेकपा–माओवादीका कार्यकर्ताहरुले घेराउ गर्दै कार्यक्रमस्थलमा ढुँगामुडा गरेका थिए ।

हेलिकप्टरबाट लहान आएका उनी त्यहाँबाट गाडीमा मिर्चैया पुगेका थिए । कार्यक्रम चलिरहेकै समयमा प्रदर्शनकारीले ढुंगा प्रहार गरेपछि प्रहरीले स्कटिङ्ग गरेर दाहाललाई बाहिर निकालिएको थियो ।

दाहाललाई प्रदर्शनकारीले कालो झण्डा समेत देखाएका थिए । सुझाव संकलनका लागि त्यहाँ पुगेका दाहालले कार्यक्रममा कुनै मन्तव्य समेत दिएनन् । प्रदर्शनकारीकाे अाक्रमणमा परी डीएसपी माधव बुढाथाेकीसहित केही प्रहरी पनि घाइते भएका छन् ।

यसबाहेक सिराहाका अन्य ५ वटा निर्वाचन क्षेत्रमा शान्तिपूर्ण रुपमा सुझाव संकलन कार्य सकिएको प्रमुख जिल्ला अधिकारी अब्दुल कलाम खाँले बताए ।

-श्रवणकुमार देव, राजविराज

प्रतिकृया दिनुहोस