बाँकेको कोहलपुर–नेपालगञ्ज सडक खण्डमा आन्दोलनकारीले हानेको ढुंगा लागेर एकजनाको मृत्यु भएको छ भने अन्य दुईजना घाइते भएका छन् ।

मोटरसाइकलमा कोहलपुरबाट नेपालगञ्जतर्फ गइरहेका नौवस्ता–२ का २२ वर्षीय करण सिंहको आन्दोलनकारीले प्रहार गरेको ढुंगा लागेर मृत्यु भएको प्रहरीले जनाएको छ । ढुंगा लागेपछि उनलाई उपचारका लागि कोहलपुर ल्याउँदै गर्दा मृत्यु भएको हो । मृतक सिंहको छाती लगायतका शरीरका अन्यभागमा चोट लागेर मृत्यु भएको चिकित्सकले बताएका छन् ।

सोही मोटरसाइकलमा पछाडि बसेका २३ वर्षीय विनोद शाही र मनोज बिसी घाइते भएका छन् । घाइते विनोदको कोहलपुर मेडिकल कलेजमा उपचार भइरहेको छ भने अर्का  घाइते मनोज बिसी आन्दोलनकारीको डरले भागेको र सम्पर्कमा आउन नसकेको प्रहरीले जनाएको छ  । उनको खोजी भइरहेको छ ।

यसअघि आजै वर्दियाको मैनापोखरमा आन्दोलनकारीले प्रहार गरेको गोली लागी प्रहरी हबल्दार देबराज पाण्डेको मृत्यु भएको थियो ।

केशव राना, बाँके

सच्याइएको

प्रतिकृया दिनुहोस