सीमाङ्कनको विरोधमा उत्रेका मधेशी मोर्चाका कार्यकर्ताले प्रहार गरेको ढुंगा लागेर मोटरसाइकल चालकको मृत्यु भएपछि अनुसन्धानका क्रममा प्रहरीले २३ जनालाई पक्राउ गरेको छ ।

घटनास्थल बाँकेको गनापुर–२ पिप्रहवामा विरोध प्रदर्शन गरिरहेका मोर्चाका कार्यकर्तालाई पक्राउ गरिएको इलाका प्रहरी कार्यालय कोहलपुर प्रमुख प्रहरी नायव उपरीक्षक राजीभ वस्नेतले जानकारी दिए ।

१८ भदौ दिउँसो करिब ३ः१५ बजे मोटरसाइकलमा कोहलपुरबाट नेपालगञ्जतर्फ गइरहेका बाँके नौवस्ता–२ का कर्ण सिंहमाथि प्रदर्शनकारीले प्रहार गरेको ढुंगा लागि मृत्यु भएको हो ।

तीनजना सवार मोटरसाइकलमा पछाडि बसेका विनोद शाही र मनोज बिसी भने सामान्य घाइते भएका छन् ।

मोटरसाइकल सहित तीनैजना लडेपछि घाइतेद्वयले मृतक सिंहलाई बोकेर कोहलपुर अस्पतालमा ल्याएका थिए । अस्पतालमा पुगेलगत्तै चिकित्सकले सिंहलाई मृत घोषित गरे ।

घाइतेमध्येका शाही अहिले प्रहरी सुरक्षामा छन् भने बिसी सिंहलाई अस्पताल पुर्‍याएलगत्तै सम्पर्कविहिन भएका छन् ।  उनी डराएर भागेको हुनसक्ने अर्का घाइते शाहीले बताए ।

अहिले नेपालगञ्ज विमानस्थल नजिक राँझामा प्रदर्शनकारी र प्रहरीबीच झडप भइरहेको खबर प्राप्त भएको छ ।
केशव राना, बाँके

प्रतिकृया दिनुहोस