संविधानसभा अध्यक्ष सुवासचन्द्र नेम्बाङले प्रमुख दलका शीर्ष नेता र प्रमुख सचेतकहरूसँग २२ भदौमा छलफल गरेका छन् ।

संविधानको विधेकमाथि असन्तुष्टि जनाउँदै केही दलहरू संविधान निर्माणको प्रक्रियाबाट बाहिरिएपछि अध्यक्ष नेम्वाङले प्रमुख दलहरूसँग छलफल गरेका हुन् ।

छलफलपछि आफ्नै कार्यकक्षमा पत्रकारसँग कुरा गर्दै उनले भने, “विजयकुमारजी, राप्रपा नेपाल, मधेशी दलहरू लगायतले राखेका असन्तुष्टि र स्थितिको बारेमा ध्यानाकर्षण गराएको छु ।”

साँघुरो सीमा भए पनि असन्तुष्ट सबैसँग छलफल गरेर संशोधनको प्रक्रियाका बीचमै उपयुक्त समाधानको बाटो खोज्न दलहरूलाई आग्रह गरेको उनले बताए ।

सकेसम्म सबैलाई समेटेर संविधान जारी गर्न उपयुक्त हुने भन्दै उनले थपे, “तपाइँहरूको अगाडि साँघुरो सीमा छ, कतै संशोधन प्रक्रियाकै बीचमा मिलाउने ठाउँ छ भने समाधान खोज्नुहोस्, मैले दलहरूलाई आग्रह गरेको छु ।”

नेम्वाङले नेताहरुलाई आफूले भनेका कुरा दोहो¥याए, “विजयजीले सभाध्यक्षले पहल गरे आउँछु भन्नुभएको छ, दलहरूलाई आवश्यकपरे म पनि सहजीकरण गरांैला सहमतिका लागि प्रयास गर्नुस् ।”

बैठकमा कांगेसका रामचन्द्र पौडेल, एमालेका केपी ओली र विद्या भण्डारी, एमाओवादीका पुष्पकमल दाहाल र बाबुराम भट्टराई साथै प्रमुख चार दलका सचेतकहरु थिए ।

बैठकमा प्रधानमन्त्री सुशील कोइराला स्वास्थ्यका कारण उपस्थित नभएको अध्यक्ष नेम्बाङले जानकारी दिए ।

शीर्ष नेताहरूले जवाफमा आजै केही नेताहरूसँग छलफल गरेको र थप छलफल गरी समस्याको समाधान पहिल्याउन लागिपर्ने बताएको पनि उनले जानकारी दिएका थिए ।

उनले भदौ मसान्तसम्म कुनैपनि हालतमा संविधान जारी हुने पनि बताएका थिए ।
कपिल भट्ट, काठमाडौं

प्रतिकृया दिनुहोस