तराई–मधेसकेन्द्रित असन्तुष्ट १० दलका ५४ सभासद्ले संविधानसभा छाडे पनि कानुनी प्रक्रियामा अवरोध नहुने देखिएको छ, तर संविधानको राजनीतिक वैधतामाथि भने गर्भदेखि नै प्रश्न उठ्ने भएको छ ।

संविधानसभाबाट बाहिरिएकाहरूमा संयुक्त मधेसी मोर्चामा रहेका चार दलका ३४, गच्छदार नेतृत्वको मोर्चाका तीन दलका १८, थरुहट तराई पार्टीका दुई, नेपाल सद्भावना पार्टीको एक र संघीय लोकतान्त्रिक राष्ट्रिय मञ्चका एकगरी ५६ सभासद् छन् ।

सभाबाट अहिलेसम्म को–को बाहिरिए ?

राजेन्द्र महतो नेतृत्वको सद्भावनाका ३ सभासद्
संविधानसभाबाट मधेसीका अधिकार सुनिश्चित नहुने भन्दै सबैभन्दा पहिले संविधानसभा छाड्ने दल सद्भावना हो । राजेन्द्र महतो नेतृत्वको सद्भावनाका तीन सभासद्ले संविधानसभामा भाग नलिने मात्र होइन, सदस्यताबाट समेत राजीनामा दिएका छन् । तर, राजीनामा सामूहिक भएकाले स्वीकृत नहुने भएको छ ।

उपेन्द्र यादवको समाजवादी फोरमका १५ सभासद्
उपेन्द्र यादव र अशोक राईको दल एकीकरण भएर बनेको संघीय समाजवादी फोरमका सभासद्ले राजीनामा त दिएका छैनन्, तर संविधानसभा बहिष्कार गर्दै आएका छन् । तराईमा आन्दोलनरत सो दलले संविधानसभामा नफर्कने अठोट लिएको छ ।

महन्थ ठाकुर नेतृत्वको तमलोपाका ११ सभासद्
तराई–मधेसकेन्द्रित दलहरूले संयुक्त लोकतान्त्रिक मधेसी मोर्चामा आबद्ध तमलोपाका ११ सभासद्ले पनि संविधानसभाका बैठक बहिष्कार गर्दै आएका छन् । यो दलका सभासद्हरू पनि आन्दोलन चर्काएर मुख्य दलहरूमाथि दबाब बढाउने रणनीतिसहित मधेसमा छन् ।

महेन्द्र यादव नेतृत्वको तमसपाका ३ सभासद्
मोर्चाको चौथो घटक तराई–मधेस समाजवादी पार्टी पनि संविधानसभाको बैठकमा होइन, तराईको आन्दोलनमा केन्द्रित छ ।

गच्छदार नेतृत्वको फोरम लोकतान्त्रिकका १४ सभासद्
संविधानसभाको प्रक्रिया सुरु हुनासाथ उपेन्द्र यादव नेतृत्वको मोर्चा आन्दोलनमा गए पनि फोरम लोकतान्त्रिकका अध्यक्ष विजय गच्छदार तीन प्रमुख दलसँग मिलेरै संविधान बनाउने प्रयासमा थिए । कांग्रेस–एमालेसँग एमाओवादीको तिक्त सम्बन्ध हुँदा पनि उनीहरुबीच सहमति गराउन गच्छदारले मध्यस्थ गर्न खोजेका थिए । तर सुनसरीदेखि कैलालीसम्म कतै पनि आफ्ना माग सम्बोधन नभएपछि मंगलबार उनले पनि संविानसभा छाडने घोषणा गरे । उनले संविधानसभा बहिस्कार गर्ने विषयमा सभामुखलाई लिखित जानकारी गराएका छन् ।

तराई मधेश केन्द्रित अन्य पाँच दलका ८ सभासद्
अन्य साना दल पनि संविधानसभा बहिस्कार गरेर आन्दोलनमा छन् । शरत्ंसिंह भण्डारीको रामसपाका तीन, गोपला दहिलको थरुहट तराई पार्टीका दुई, राजकिशोर यादवको फोर गणतान्त्रिकका एक, अनिल झाको नेपाल सदभावना पार्टीका एक र रुक्मिणी चौधरीको संघीय लोकतान्त्रिक राष्ट्रिय मञ्चका एक सभासदं्ले तराई–मधेशका अधिकार सुनिश्चित गर्न भन्दै आन्दोलनमा लागेका छन् । रुक्मिणी चौधरीले त प्रस्तावित संविधानमा संशोधन हालेर प्रक्रियामा भाग लिन खोजेकी थिइन् तर पार्टीले निर्देशन दिएपछि मंगलबारबाट उनी पनि आन्दोलनमा गएकी छिन् ।

प्रतिकृया दिनुहोस