थरुहट संयुक्त संघर्ष समिति बाँकेका संयोजक चन्द्रबहादुर चौधरीले सडक आन्दोलन नगर्ने भन्दै संयोजकको पदबाट राजीनामा गरेका छन् ।

पछिल्लो समय बाँकेको कोहलपुरमा आन्दोलनकारीबाट एक सर्वसाधारणको मृत्यु भएपछि विकसित परिस्थिति र उनी आवद्ध पार्टी एमालेको दबाबका कारण चौधरी संयोजकको जिम्मेवारीबाट पछाडि हटेका हुन् ।

चौधरी एमाले बाँकेका सचिवालय सदस्य तथा लोकतान्त्रिक थारु संघका केन्द्रीय सदस्य समेत हुन् ।

२३ भदौमा विज्ञप्ति जारी गर्दै उनले एमाले बाँकेको टोली थारु समुदायका माग राख्न केन्द्रमा जाने भएकाले आफूले जिम्मेवारीबाट बिदा लिएको उल्लेख गरेका छन् । उनले अब सडक संघर्षमा नजाने तर अधिकारको आन्दोलनलाई भने नछोड्ने उल्लेख गरेका छन् ।

चौधरीले संयोजकको जिम्मेवारीबाट बिदा लिएपछि संयोजक कसलाई तोक्ने भन्नेमा समितिभित्र अन्यौल छ ।

बाँकेमा बन्दको प्रभाव न्यून
अहिले बाँकेका कोहलपुर, नेपालगञ्ज लगायतका बजारमा यातायात, व्यवसाय निर्वाध सञ्चालन भइरहेका छन् ।

मधेशी मोर्चाका कार्यकर्ताले प्रहार गरेको ढुंगा लागेर नौवस्ता २ का करण सिंहको मृत्यु भएपछि बन्दको प्रभाव घटदै गएको हो ।

मृतक करण सिंहको हत्यारालाई कारबाहीको माग गर्दै निकालिएको ठूलो र्‍यालीमा आमहडतालको विरोधमा नारा लागेपछि पनि बन्द प्रभाव कम हुँदै गएको हो ।

सिंहको हत्या गरेको अभियोगमा बाँके प्रहरीले शिवशंकर भाटविरुद्ध कर्तव्य ज्यान मुद्दा दर्ता गरेको छ । प्रहरीले जिल्ला अदालत बाँकेबाट म्याद थप गरेर थप अनुसन्धान गरिरहेको जनाएको छ ।

त्यस्तै सोही घटनामा संलग्न भई अन्य सवारीका साधनहरु तोडफोड गर्ने कार्यमा संलग्न धर्मेन्द्र बर्मा र प्रदीप गडरियाविरुद्ध सार्वजनिक मुद्दा दायर गरिएको बाँके प्रहरीले जनाएको छ ।

केशव राना, बाँके

प्रतिकृया दिनुहोस