नेपाली कांग्रेस, नेकपा एमालेलगायत सरकारविरुद्ध आन्दोलनरत दलहरुको उपत्यकास्तरीय सर्वदलीय कार्यकर्ता भेलालाई सम्बोधन गर्दै नेपाली काँग्रेसका सभापति सुशील कोइरालाले वर्तमान सरकार सर्वसत्तावादको दिशातिर अग्रसर भएको र अन्तरिम संविधानलाई रद्दीको टोकरीमा फालेको टिप्पणी गरे ।

सभापति कोइरालाले वर्तमान सरकारको बहिर्गमनबिना चुनाव सम्भव नभएको बताए । उनले भने, “सात–आठ दिनभित्र सहमति नभए वैशाखमा चुनाव गर्न सकिँदैन, वर्तमान सरकारविरुद्ध हामी आन्दोलनमा प्रवेश गरिसकेका छौँ ।  हाम्रो आन्दोलन सफल भइछाड्नेछ, ढुक्क हुनुहोस् ।”

नेकपा एमालेका अध्यक्ष झलनाथ खनालले एमाओवादीको सर्वसत्तावाद र सत्तालिप्साका कारण मुलुकले राजनीतिक समाधान पाउन नसकेको बताए । उनले देशै ठप्प पारेर वर्तमान सरकारलाई घुँडा टेकाउने स्थितिमा पु¥याइने चेतावनी दिए । खनालले भने, “सर्वसत्तावाद टिकाउन खोजे जनआन्दोलनको अर्को आँधिबेहरी आउनेछ र त्यसले पूर्वराजा ज्ञानेन्द्रलाई जस्तै वर्तमान प्रधानमन्त्रीलाई बढारेर लैजानेछ ।” अध्यक्ष खनालले वर्तमान सरकारविरुद्ध राष्ट्रपतिले कदम चाल्ने बेला आइसकेको टिप्पणी गरेका थिए ।

त्यस्तै नेकपा एमालेका महासचिव ईश्वर पोखरेलले वर्तमान सरकार राष्ट्रियताको सवालमा च्यूत भइसकेको बताए ।

पूर्वप्रधानमन्त्री सूर्यबहादुर थापा, राप्रपाका अध्यक्ष पशुपति शम्शेर राणा, नेकपा मालेका महासचिव सिपी मैनालीलगायतले संविधानसभा विघटनसँगै वर्तमान सरकारको संवैधानिक हैसियत समाप्त भइसकेकाले प्रधानमन्त्रीले मार्गप्रशस्त गर्नुपर्ने बताएका थिए । रासस

प्रतिकृया दिनुहोस