नेपाल महिला संघद्वारा २२ मंसीरमा काठमाडौंमा आयोजित कार्यक्रमलाई सम्बोधन गर्दै नेताहरुले एमाओवादीले सत्ता लम्ब्याएर सत्ताकब्जा गर्ने रणनीति अन्तर्गतनै कांग्रेसले उम्मेदवार घोषणा गरेपछि बोली फेरेको र एकपछि अर्को शर्त तेस्र्याएर निर्वाचन हुन नदिने र सत्ता लम्ब्याउने खेलमा लागेको आरोप लगाए ।

एमाओवादी सहमतिमा नआए अबको लडाई अधिनायकवाद र सत्ताकब्जा विरुद्ध हुने भन्दै नेताहरुले अब पनि बार्गेनिङको धृष्टता नगर्न एमाओवादीलाई आग्रह गरेका छन् ।

कांग्रेस सभापति सुशील कोइरालाले लोकतन्त्रको मूल्य मान्यताविपरीत एमाओवादी गएमा लोकतन्त्रको लहरले बगाएर लैजाने चेतावनी दिंदै प्रजातान्त्रिक मूल्य, मान्यता र आदर्शविरुद्ध पार्टीको शिर झुकाउने काम आफूबाट नहुने बताए ।
उनले भने, “कांग्रेसभित्र पदको लागि झगडा छ भनेर कोलाहाल मच्चाइयो तर संकट पर्दा कांग्रेस जहिले पनि एक भएर निर्णय गर्छ ।”

वरिष्ठ नेता शेरबहादुर देउवाले एमाओवादीलाई धेरै शर्त तेस्र्याएर राजनीतिक समस्या नलम्बाउन र अब कुनै कचकच नगरी कांग्रेसका उम्मेदवारलाई प्रधानमन्त्रीमा सघाउन आग्रह गरे । “धेरै शर्त राखेर समस्या बल्झिने मात्र हो अब कुनै पनि शर्त तेर्साएर अप्ठयारो पार्ने र समस्यालाई लम्बाउने काम गर्न हुँदैन,” वरिष्ठ नेता देउवाले भने ।

उपसभापति रामचन्द्र पौडेलले संविधानका अन्तरवस्तुमा सहमति गरेर जाने हो भने किन चुनाव चाहियो भन्ने प्रश्न गरे । उनले थपे, “एकपछि अर्को शर्त तेस्र्याएर सत्ता लम्बाउने र सत्ताकब्जा गर्ने माओवादीले षड्यन्त्र गर्दैछ, यस्तै सौदावाजी धेरै गर्न थाले अब फेरि एकचोटि लोकतन्त्र र अधिनायकवादविरुद्ध लडाइँ लड्नुपर्छ ।”

महामन्त्री प्रकाशमान सिंहले कांग्रेसले प्रधानमन्त्रीको उम्मेदवारी तोकेपछि माओवादीले बोली फेरेको बताए । “संविधानका अन्तरवस्तुमा कुरा मिलेको भए पहिलेनै संविधान बन्थ्यो, शर्त तेस्र्याएर माओवादीले निर्वाचन नगर्ने र सत्ता लम्ब्याउने चाल चालेको छ,” महामन्त्री सिंहको भनाई थियो ।

प्रतिकृया दिनुहोस