राष्ट्रपति रामबरण यादव (दायाँ) र भारतीय विदेशमन्त्री सलमान खुर्सिद नयाँ दिल्लीमा । तस्बीरः एपी

भारत भ्रमणमा रहेका राष्ट्रपति रामवरण यादवसँग नयाँदिल्लीमा भएको भेटपछि पत्रकारसँग कुरा गर्दै खुर्सिदले भने, “भारत नेपालमा राजनीतिक स्थिरता चाहन्छ त्यसैले, त्यहाँका राजनीतिक दलहरुबीच सहमति जुटाउने प्रयास भइरहेको छ ।” नेपाल भारतको नजिकको सम्बन्धका कारण नेपालको मामिलामा भारतको चासो हुनु स्वभाविक रहेको पनि उनले बताए ।

भारतीय राष्ट्रपतिलाई निम्तो

११ पुसमा राष्ट्रपति रामवरण यादव र भारतीय राष्ट्रपति प्रणव मुखर्जीबीच भेटवार्ता भएको छ । बिहान नयाँ दिल्लीस्थित राष्ट्रपति भवनमा भएको भेटवार्तामा नेपालको राजनीतिक गतिरोध र दुईपक्षीय सम्बन्धका विषयमा छलफल भएको छ ।

भेटमा राष्ट्रपति यादवले भारतीय राष्ट्रपति मुखर्जीलाई नेपाल भ्रमणको निम्तो दिएका छन् । जवाफमा  राष्ट्रपति मुखर्जीले उपयुक्त समय मिलाएर नेपाल आउने वचन दिएको शीतल निवास स्रोतले जनाएको छ ।

राष्ट्रपतिसँगको भेटमा नेपालका तर्फबाट सिँचाइमन्त्री महेन्द्र यादव र परराष्ट्र सचिव दुर्गाप्रसाद भट्टराई तथा भारतका तर्फबाट विदेश सचिव रञ्जन मथाई र नेपालका लागि भारतीय राजदुत जयन्तप्रसादको सहभागिता थियो ।

आजै राष्ट्रपति यादवसँग प्रधानमन्त्री मनमोहन सिंह, उपराष्ट्रपति हमिद अन्सारीलगायतका नेताहरूले पनि भेटवार्ता गर्ने कार्यक्रम छ । भारतीय रक्षामन्त्री एके एन्टोनी, गृहमन्त्री सुशीलकुमार सिन्देले भने राष्ट्रपति यादवसँग १२ पुसमा मात्रै भेट गर्ने कार्यक्रम तय भएको छ । भोलि नै राष्ट्रपतिले भारतको एम्स अस्पतालमा स्वास्थ्य जाँच गराउने छन् ।

वनारस हिन्दू विश्वविद्यालयले प्रदान गरेको “डाक्टर अफ ल” को मानार्थ उपाधि ग्रहण गरेपछि राष्ट्रपति यादव १० पुसमा नयाँ दिल्ली पुगेका हुन् ।

प्रतिकृया दिनुहोस