२४ पुस बिहान राष्ट्रपति डा यादवलाई भेट्न शीतलनिवास पुगेको एकीकृत नेकपा माओवादीका अध्यक्ष पुष्पकमल दाहालसँग भोलिसम्ममा सहमति जुटाउन आग्रह गर्दै त्यसो हुन नसके सहमतिको अन्य विकल्प दिन आग्रह गरेका छन् ।

राष्ट्रपति यादव र अध्यक्ष दाहालबीच बिहान साढे ९ बजेदेखि करिब एक घण्टासम्म भएको छलफलमा रिक्त हुदै गएका संवैधानिक निकायमा नियुक्ति, संविधानसभाको निर्वाचन, दलहरुबीच भइरहेको सहमतिको प्रयासका विषयमा छलफल भएको थियो ।

मन्त्रिपरिषद् विघटन गरेर बाबुराम भट्टराईकै नेतृत्वमा सहमतीय सरकार बनाउन सकिने सम्भावनाका विषयमा पनि छलफल भएको राष्ट्रपतिको निजी सचिवालयले जनाएको छ । “राष्ट्रपतिले गर्ने परामर्शमा विभिन्न विकल्पहरु आएको र यो सरकारलाई बहुमतीय प्रक्रियाबाट निकालेर सहमतीय सरकार बनाउनमा दलहरुबीच सहमति जुटाउनेमा पनि छलफल भएको छ ,” राष्ट्रपतिका कानूनी सल्लाहकार सूर्य ढुङ्गेलले बताए ।

निकासका सम्भावना पहिल्याउन राष्ट्रपति यादवले परामर्श जारी राखेका छन् । अहिले राष्ट्रपति यादवले राष्ट्रिय जनशक्ति पार्टीका अध्यक्ष सूर्यबहादुर थापासँग पनि छलफल गरेको राष्ट्रपति कार्यालयले जनाएको छ ।

प्रतिकृया दिनुहोस