“वार्ताको माध्यमबाट सहमति हुने सम्भावना निकै कम रहेकाले अब जनजागरण अभियान शुरु गर्ने विषयमा आज छलफल भएको छ,” एमाले प्रचार विभाग प्रमुख प्रदीप ज्ञवालीले भने, “वार्ताको ढोका पूरै बन्द गरिसकेका त छैनौं तर, समयमै निर्वाचन गराउनका लागि दबाव दिन पनि आन्दोलनमै जानु पर्ने अवस्था छ । ”

पार्टी मुख्यालय बल्खुमा २५ पुसमा जारी बैठकमा जनजागरण अभियान शुरु गर्ने बारेमा लगभग टुंगो लागेको भन्दै उनले अभियान अन्तर्गत सरकारले गरेका जनविरोधि र आपराधिक गतिविधिहरुको भण्डाफोर गर्ने, मुलुकमा बढ्दो हिंसा, भ्रष्टाचार, दण्डहिनताविरुद्ध जनतालाई सक्रिय बनाउने र आम नेपालीको जनजीवनसँग गाँसिएका मुद्दाहरु सशक्त ढंगले उठाउँदै आन्दोलन गर्ने बताए । उनले भने, “बैठकले सम्भवतः भोलीसम्मा यसबारे टुंगो लगाउने छ ।”

बैठकमा पार्टी अध्यक्ष झलनाथ खनालले जारी राजनीतिक सङ्कट, यसबीचका वार्ता र सहमतिका प्रयास तथा एमाओवादीका कारण सहमतिको प्रयास सफल हुन नसकेको स्थितिबारे बैठकलाई जानकारी गराएका थिए ।

त्यस्तै बैठकले दैलेखका पत्रकार डेकेन्द्र थापाको हत्याको अनुसन्धानलाई अवरोध सिर्जना गर्न खोज्ने प्रधानमन्त्रीका क्रियाकलापको भत्र्सना गर्दै विशेष प्रस्ताव पारित गरेको छ भने विगत केही समयदेखि राजधानीलगायत विभिन्न स्थानमा बढेको चन्दा आतङ्क, बैकर्स एसोसिएसनका अध्यक्ष राजनसिंह भण्डारीमाथि चन्दा नदिएको निहुँमा गरिएको आक्रमण, नेपाल डेरिभेटिभ एक्सचेन्जमा चन्दाकै निहुँमा गरिएको तोडफोड र आतङ्कको निन्दा गर्दै यस्ता क्रियाकलापमा सत्तारुढ दलकै व्यक्तिहरू संलग्न देखिनु आपत्तिजनक भएको ठहर गरेको छ ।

प्रतिकृया दिनुहोस