धनुषा जिल्लाको खरिहानी–५ बस्ने सङ्गीतादेवी साहलाई प्रसव पीडा हुनथालेपछि उपचारका लागि जनकपुर अञ्चल अस्पताल ल्याउँदै गर्दा उनले बीच बाटामै नवजात शिशुलाई जन्म दिएकी थिइन् । नवजात शिशु र आमालाई थप उपचारका लागि सो अस्पतालको प्रसूति वार्डमा भर्ना गरियो । उता सोही समयमा महोत्तरीको लक्ष्मीनियाँ–५ बस्ने रेणुदेवी महतोलाई पनि प्रसवपीडा शुरु भएकाले उनलाई सोही वार्डमा भर्ना गरिएको थियो ।

साह र महतोको शय्या एकै ठाउँमा थियो । २८ पुस बिहान ८:१५ बजे महतोले पनि एक नवजात शिशुलाई जन्म दिइन् । त्यहाँ राखिएका दुई शिशुमा एउटा छोरा र अर्को छोरी थियो । कसले छोरो जन्माएकी थिइन् भन्ने कुरा त्यहाँ रहेकी परिचारिकाले समेत ठम्याउन सकेनन् । यस्तैमा ‘मेरो छोरो साटियो’ भनेर दुई पक्षबीच विवाद शुरु भयो । यो विवादले केहीबेर अस्पताल परिसर तनावग्रस्त बनेको अस्पतालको प्रहरी विटका प्रहरी हवल्दार सन्तोष सिंहले बताए ।

विवाद चर्किंदै जाँदा प्रहरीले दुवै आमा र नवजात शिशुको डिएनए परीक्षणका लागि नमूना काठमाडौं पठाएको प्रहरी निरीक्षक गोविन्द पुरीले बताएका छन् ।

रासस

प्रतिकृया दिनुहोस