नेपाल प्रेस युनियन धनकुटाले ९ माघ विहान धनकुटामा गरेको पत्रकार सम्मेलनमा बोल्दै नेता केसीले एमाओवादीले निर्वाचनको कल्पनासम्म नगरेको भन्दै अनेकौं भ्रम छर्दै सत्ता कब्जाको रणनीतिमा लागेको आरोप लगाए । एमाओवादीप्रति आक्रोशित देखिएका केसीले देशको सम्पूर्ण संयन्त्रलाई एमाओवादीले लथालिङ्ग अवस्थामा पुर्‍याएको भन्दै थपे, “राज्य सञ्चालनको मुख्य जिम्मेवारी लिएको पार्टीका नेताहरुले सार्वजनिक रुपमा अहिलेसम्म भएका सम्झौता च्यातेर फाल्छु भनेर घुर्की र धम्की दिदै हिड्नु लज्जास्पद हो, हिम्मत भए च्यातेर देखाए हुन्छ ।”

उनले एमाओवादी र मधेशी मोर्चा सहमति पनि नगर्ने, सत्ता पनि नछाड्ने र निर्वाचन नगराउने षडयन्त्रमा लागेको दाबी गरे । वर्तमान सरकार इतिहासकै असफल र घुसखोर भएको आरोप लगाउँदै नेता केसीले आन्दोलनको बलबाट नै बाबुराम भट्टाराईको सरकारलाई घुँडा टेकाई छाड्ने बताए । उनले आन्दोलनलाई सफल बनाउन पार्टी कार्यकर्ताहरुलाई निर्देशन समेत दिएका थिए ।

सन्तोष रुचाल, धनकुटा

प्रतिकृया दिनुहोस