गोरखापत्रबाजेका नामले चर्चित पत्रिका वितरक (पछिल्लो समयमा पत्रिका व्यापारी) ८० वर्षीय चन्द्रकान्त पौडेलको शव पोखराको माटेपानीस्थित सेती नहरमा २१ माघ दिउँसो फेला परेको जिल्ला प्रहरी कार्यालय कास्कीले जनाएको छ ।

पञ्चायतको शुरुदेखि नै पोखराबासीको राजनीतिक चेतनालाई लगातार घच्घच्याउँदै, त्यतिबेला हल्ला गर्दै पत्रिका बेच्ने नामूद वितरक चन्द्रकान्त पौडेल २१ माघ बिहानैदेखि वेपत्ता थिए । राति खाना खाएर सुतेका पौडेललाई बिहान नदेखेपछि उनको परिवारले खोजी गर्दा दिउँसो पोखरा–१३ तीनकुना मुहानस्थित नहरमा मृत अवस्थामा फेला परेको प्रहरीले जनाएको छ । उनको मृत्युको कारण खुल्न नसकेको र अनुसन्धान भइरहेको प्रहरीले जनाएको छ ।

उतीबेला पत्रिकाहरु धेरै नहुँदा गोर्खापत्र बेचेर गुजारा गर्ने बाजे समाचारहरुलाई आफूखुशी ब्याख्या गर्दै कराउँथे र तत्कालीन राजनीतिको दिशावोध गराउँथे । मुलुकमा भएका विभिन्न प्रजातान्त्रिक आन्दोलनमा पनि सक्रिय रहेका बाजेले बीपी कोइरालाका विचारहरु जनसमक्ष पुर्‍याउनमा पनि महत्वपूर्ण योगदान दिएका थिए ।

प्रतिकृया दिनुहोस