बालक अपहरणको आरोपमा पर्सा प्रहरीले पक्राउ गरेका अभियुक्तहरु । तस्बीर: अली असगर

प्रहरीले पर्साको भेडियारी गाविसबाट २२ माघ बिहान बालक श्लोक अग्रवालको उद्धार गरेको हो । आदर्शनगरका व्यापारी अशोक अग्रावालका ८ वर्षीय छोरा श्लोक अग्रवाल माघ १३ गते घर नजिकैबाट अपहरणमा परेका थिए । सुराकीको आधारमा जिल्ला प्रहरी कार्यालय पर्साबाट प्रहरी उपरीक्षक पिताम्बर अधिकारीको नेतृत्वमा खटिएको टोलीले भेडियारी गाविस–९ गदियानी टोलका रामनाथ गिरिको घरबाट श्लोकलाइ अपहरणमुक्त गराएको हो ।

बालकको उद्धार गर्ने क्रममा प्रहरी र अपहरणकारी बीच भएको भिडन्तमा प्रहरीले चलाएको गोली लागेर दुई जना अपहरणकारी रामनाथ गिरीका छोरा संजय गिरी र थर खुल्न नसकेका विन्देश्वर नाम गरेका अर्का एकजनाको मृत्यु भएको छ भने अपहरणकारीले चलाएको गोली लागेर दुई जना प्रहरी जवान सूर्यबहादुर थापा र बोदाबहादुर तामाङ पनि घाइते भएका छन् । प्रहरीले घटनास्थलबाट कटुवा बन्दुक दुई थान, एसएलआरमा लाग्ने गोली पाँच राउण्ड बरामद गरेको छ ।

बालकको उद्धार गर्ने क्रममा प्रहरीले गिरिको घर घेरा हालेपछि अपहरणकारी समूहले अचानक गोली चलाएपछि प्रहरीका तर्फबाट जवाफी कार्वाहीमा १७ राउण्ड गोली चलाइएको प्रहरी उपरीक्षक अधिकारीले बताए । अपहरणमा संलग्न रहेको भन्दै प्रहरीले बालकलाइ बन्धक बनाएर राखिएको घरका धनी रामनाथ गिरीका पत्नी ४५ वर्षीया रम्भादवी गिरी, छोरा १९ वर्षीय अजय गिरीसहित ६ जनालाई नियन्त्रणमा लिएको प्रहरीले जनाएको छ । अपहरणमा संलग्न रहेको भन्दै प्रहरीले वीरगञ्ज १३ का २० वर्षीय कुनाल अग्रवाल, १९ वर्षीय पन्नालाल सहनी, ३२ वर्षीय राजनबाबु बानिया र १८ वर्षीय सिकेन्द्र यादवलाई नियन्त्रणमा लिएको छ ।

भेडियारीका पन्नालाल सहनीसहित ४ जनालाइ १९ माघमा नियन्त्रणमा लिएपछि उनीहरुको बयानका आधारमा प्रहरीले रामनाथ गिरीको घरमा छापा मारेको हो । गत१३ माघमा आदर्शनगर बालमन्दिर नजिकै रहेको घर अगाडि खेलीरहेका बेला मोटरसाइकलमा आएका दुइ जनाले बालक श्लोकको अपहरण गरेका थिए । अपहृत बालक सकुशल छन् ।

अली असगर, वीरगञ्ज

प्रतिकृया दिनुहोस