हेटौंडामा जारी एमाओवादी महाधिवेशनको बन्द सत्रमा प्रधानमन्त्री भट्टराईले सरकारमा रहेर पार्टीलाई घाटा नभएको भन्दै आफूहरु सरकारमा नभएको भए द्वन्द्वकालका मुद्दा उठाएर आफूहरुलाई हेगस्थित अन्तर्राष्ट्रिय अदालतमा लग्ने तयारी रहेको बताए । बन्दसत्रमा प्रतिनिधिहरुले सरकारको आलोचना गरेपछि जवाफ दिंदै भट्टराईले भने, “सरकारमा रहेर प्रतिक्रान्तिलाई रोकेका छौं ।” उनले दैलेखका पत्रकार डेकेन्द्रराज थापा हत्याको प्रकरण हेग लैजाने तयारी अनुसार चर्काइएको दाबी गरे ।

उनले भारतसँग गरेको विप्पा सम्झौता राष्ट्रघात नभएर लगानी बढाउने माध्यममात्रै भएको बताउँदै यस्तो सम्झौता अन्य धेरै देशहरुसँग गर्नुपर्नेमा जोड दिए । धोविघाट प्रकरणमा माफी माग्नु पर्ने संस्थापन पक्षका अधिकांश प्रतिनिधिको जवाफमा उनले त्यस प्रकरणलाई कोट्याउनु जरुरी नभएको भन्दै त्यसबाट पाठ सिक्नुपर्ने बताएका थिए ।

उनले विगतका सरकारहरु भन्दा आफूले राम्रो काम गरेको पनि दाबी गरेका थिए ।

प्रतिकृया दिनुहोस