प्रधानन्यायाधीश खिलराज रेग्मीको नेतृत्वमा चुनावी सरकार गठन गर्नका लागि आवश्यक वातावारण बनाउन अन्य विषयहरुमा सहमति गर्नका लागि चार राजनीतिक शक्तिका नेताहरुको २६ फागुन दिउँसो बैठक बस्दैछ ।

२४ फागुनमा एमाओवादी, नेपाली कांग्रेस, नेकपा एमाले र मधेशी मोर्चाका शीर्ष नेताहरूको बैठकमा नेपाली सेनाको तालिम लिइरहेका माओवादी पूर्व लडाकुलाई दिइने दर्जा बाहेकका विषयमा करिब सहमति भइसकेको नेताहरुले दावी गरेका थिए ।

एमाओवादीले समायोजनमा महासेनानीसहित दुई मुख्य सेनानी पद चाहिने माग गरेपछि विवाद बल्झिएको नेताहरूले बताएका छन् । प्रतिपक्षी दलहरूले सैनिक ऐनअनुसार दर्जा मिलान गर्नुपर्ने अडान राखेका छन् । यसैगरी मतदाता नामावली अद्यावधिक गर्ने विषयमा पनि दलहरूबीच फरक फरक अडान देखिएपछि २५ फागुनको बैठक सहमतिमा पुग्न नसकेको बताइएको छ ।

बहालवाला प्रधानन्यायाधीश नेतृत्वमा चुनावी सरकार बनाएर संविधानसभाको निर्वाचनमा जाने सैद्धान्तिक सहमति दलहरूबीच भए पनि विवादित विषय बल्झिन थालेपछि प्रक्रिया झनै जटिल बनेको छ ।

प्रधानन्यायाधीशलाई सरकारको नेतृत्व दिन नहुने भन्दै सर्वोच्च अदालतमा परेको रिटमाथि सुनुवाई चैत १ गते हुने भएपनि दलहरू भने त्यसअघि नै चुनावी सरकार बनाउने कसरतमा छन् ।

प्रतिकृया दिनुहोस