प्रधानन्यायाधीश खिलराज रेग्मीलाई चुनावी सरकारको नेतृत्व दिनका लागि प्रमुख चार राजनीतिक शक्तिहरुले गरेको सहमतिको विरोधमा मोहन वैद्य नेतृत्वको नेकपा–माओवादीले आन्दोलन गर्ने भएको छ ।

“हामी कुनै व्यक्ति विशेष प्रधानमन्त्री हुने नहुने भन्दा पनि चार राजनीतिक दलहरुले गरिरहेको अहिलेको क्रियाकलापको विरोध गर्छौ,” नेकपा-माओवादी केन्द्रीय सदस्य महेश्वर दाहालले हिमालखबरलाई बताए । उनले थपे, “बाबुराम भट्टराईले तुरुन्तै सरकार छोड्नु पर्छ ।”

विघटित संविधान सभामा प्रतिनिधित्व गरेका सबै राजनीतिक दलहरु र अन्य पक्षसम्बद्ध गोलमेच सम्मेलनबाटै राजनीतिक निकास निकालिनुपर्ने उनले बताए ।

अहिले केही बेरमै विघटित संविधान सभामा प्रतिनिधित्व गरेका अधिकांश दलहरुले मधेशी मोर्चा र तीन प्रमुख दलहरुले गरेको सहमतिको विरोधमा राष्ट्रपति रामवरण यादवलाई ज्ञापन पत्र बुझाउने तयारी भइरहेको र त्यसका लागि राष्ट्रपतिसँग समय मागिएको दाहालले जानकारी गराए ।

त्यस्तै १ चैतमा सिंहदरबार घेराउ गर्ने कार्यक्रम तय भएको नेकपा–माओवादीले जनाएको छ ।

प्रतिकृया दिनुहोस