वीरगञ्जमा नेपाल भारत सीमास्थित गेट

पर्साको ग्रामीण क्षेत्रमा रहेका सरकारी स्वास्थ्य संस्थाहरुमा दरबन्दी अनुसारको स्वासथ्यकर्मी नभएका कारण स्थानीय बिरामीहरु उपचारका लागि सदरमुकाम वीरगन्ज र सीमावर्ती भारतीय बजारका अस्पतालमा जान बाध्य भएका छन् ।

पोखरीया अस्पतालका साथै प्राथमिक स्वास्थ्य केन्द्र भिखमपुर, लंगडी हेल्थ पोष्ट, ईलाका हेल्थ पोष्ट सेढवा लगायतका स्वास्थ्य संस्थाहरुमा दरबन्दी अनुसारका स्वास्थ्यकर्मी छैनन् । भएका स्वास्थ्यकर्मी पनि तालिम र व्यक्तिगत कामका लागि भन्दै बिदा लिएर बस्ने गरेका कारण बिरामीहरुलाई थप सास्ती भएको छ ।

पोखरीया अस्पतालमा तीन जना स्टार्फ नर्स र ६ जना अनमीको दरवन्दी भए पनि अहिले एक जना पनि महिला स्वास्थ्यकर्मी छैनन् । दक्ष जनशक्तिको अभावमा प्रसुतीका लागि आउने महिलालाई सदरमुकाम वीरगञ्जका अस्पतालमा पठाउनु परेको पोखरीया अस्पताल व्यवस्थापन समितिका अध्यक्ष मैनुद्दिन अन्सरीले बताए ।

त्यस्तै भीखमपुर प्राथमिक स्वास्थ्य केन्द्रमा पनि एक जना स्टार्फ नर्स र तीन जना अनमीको दरबन्दी भएपनि अहिले त्यहाँ एक जना पनि महिला स्वस्थयकर्मी नरहेको स्थानीयवासीले बताएका छन् ।

लंगडी हेल्थ पोष्टमा अहेव नहुदा स्थानीय बिरामीलाई उपचारमा समस्या भएको छ । दुईजना अहेवको दरवन्दी रहेपनि दुबै जना सरुवा भएर अन्यन्त्र गएको जिल्ला स्वास्थ्य कार्यालय पर्साले जनाएको छ ।

स्वास्थ्य मन्त्रालयले स्वास्थ्यकर्मीको अन्यत्र सरुवा गरे पनि रिक्त रहेको ठाउमा अर्को जनशक्ति नपठाएकाले बिरामीलाई सेवा प्रवाह गर्न समस्या भएको जिल्ला स्वास्थ्य कार्यालय पर्साका प्रमुख अरुण कुमार महतोले बताए ।
अली असगर, वीरगञ्ज

प्रतिकृया दिनुहोस