दमौली बजार: फाइल तस्बीर

लागु औषध सेवन गरेको अभियोगमा पक्राउ परेका तनुहँ पोखरी भञ्ज्याङ ४ का २२ वर्षीय सुजन तामाङलाई प्रहरीले नै हत्या गरेको भन्दै आफन्त प्रदर्शनमा उत्रिएपछि दमौलि तनावग्रस्त बनेको छ ।

आक्रोशित भीडलाइ नियन्त्रण गर्न प्रहरीले एक दर्जन हवाई फायरका साथै सयौं सेल अश्रुग्याँस प्रहार गरेको छ । त्यस्तै प्रर्दशनकारीले एउटा सरकारी गाडी तोडफोड गर्नुका साथै ट्राफिक प्रहरी बिटमा समेत आगजनी गरेका छन् ।

प्रर्दशनकारीहरुलाई नियन्त्रणमा लिन प्रहरीलाइ हम्मे हम्मे भएपछि पोखराबाट थप सय जना प्रहरी बोलाइएको छ ।

लागु औषध गाँजा सहित पक्राउ परेका तामाङलाई स्वास्थ्य जाँच गराउन तनहुँ अस्पताल लगिएकोमा उनी त्यहाँबाट भागेको र भाग्ने क्रममा मादी नदीको भीरबाट खसेर घाइते भएको जिल्ला प्रहरी कार्यालय तनुहँका प्रमुख एसपी देवबहादुर बोहोराले बताए । भीरबाट हामफाल्दा ढुंगामा बजारिएर तामाङको खुट्टा भाँचिएको र शरीरका अन्य भागमा चोट लागेपछि राती नै उपचारको लागि पोखरा लगिएको थियो । उपचारकै क्रममा पश्चिमाञ्चल क्षेत्रीय अस्पतालमा तमाङको १६ चैत विहान तीन बजे मृत्यु भएको तनहुँ प्रहरीको दाबी छ ।

बोहोराका अनुसार गस्ती प्रहरीले तामाङलाई १५ चैत राती ११ बजे व्यास १ हाइस्कुलटारबाट पक्राउ गरेको थियो । तर, आफन्तले भने हत्याको आरोप लगाउँदै पृथ्वीराज मार्ग अवरुद्ध पार्दै प्रर्दशनमा उत्रीएका छन् ।

तामाङको शव पश्चिमाञ्चल क्षेत्रीय अस्पतालमा पोखरामा छ ।
माधव बराल, पोखरा

प्रतिकृया दिनुहोस