गृहमन्त्रालयको नागरिकता वितरण टोलीसँगै मतदाता नामावली संकलन गर्ने टोली पठाउने तयारी भए पनि प्राविधिक कारणले अझै एक–दुई दिन लाग्ने देखिएको आयोगले जनाएको छ ।

निर्वाचन आयोगका आयुक्त अयोधीप्रसाद यादवले गृहमन्त्रालयका कारण मतदाता नामावली संकलनमा ढिलाई भएको जानकारी दिए । गृहमन्त्रालयले नागरिकता वितरणका लागि पठाएको टोलीसँगै समन्वय गरेर केही जिल्लामा शुरु भएको र बाँकीमा केही दिनमा नै टोली पठाउने यादवले बताए ।

गृहमन्त्रालयले नागरिकता वितरणका लागि ३ सय ५ वटा टोली तयार गरे पनि गाउँ गाउँमा पुगिसकेका छैनन् ।

निर्वाचन आयोगले ८ सयभन्दा बढी टोली मतदाता नामावली संकलनमा पठाउने तयारी गरे पनि पहिलो चरणमा ३ सय ५ वटा टोली नै खटाउनेछ ।

गृहमन्त्रालयले प्राविधिक विषय नमिलेका कारण एकदुई दिनमा टोली खटिने जानकारी दिएको छ । गृहमन्त्रालय नागरिकता फाँटका अधिकृत उमेश ढकालले केही प्राविधिक तयारी बाँकी रहेको र एकदुईदिन भित्रै टोली खटाउने जानकारी दिए ।

बैशाखको पहिलो हप्ताबाट ३ सय वटा टोली खटिने निर्णय भए अनुसार यो हप्ताबाट गाउँ गाउँमा जाने र बाँकी ५ सय ६१ वटा टोलीका लागि मन्त्रिपरिषद्ले निर्णय गरेपछि मात्रै पठाउने ढकालले बताए ।

प्रतिकृया दिनुहोस