दलहरुबीच को पहिला आएको हो त्यही आधारमा पहिला दर्ता हुनुपर्ने भन्दै विवाद भएपछि निर्वाचन आयोगको सचिवालयको बैठक बसेर क्रमसंख्या पछि तोक्ने गरी दल दर्ता गर्ने सूचना जारी गरेको छ ।

आयोगको निर्णयमा दलहरु पनि  सहमत भएपछि दल दर्ता प्रक्रिया केहीबेरमा शुरु हुने आयोगले जनाएको छ । १७ बैशाखदेखि आयोगले दर्ता खोलेपछि दल दर्ता सूचीमा पहिलो हुने होडबाजीले गर्दा एमाले र एमाओवादी बीच विवाद भएको थियो ।

एमाले अध्यक्ष झलनाथ खनाल र एमाओवादी उपाध्यक्ष बाबुराम भट्टराईबीच आयोग परिसरमै छलफल भए पनि सहमति हुन सकेन ।

दल दर्ताका लागि बिहान ९ बजेबाट खुला हुने आयोगले सूचना जारी गरे पनि नेताहरु पहिलो नम्बरमा दर्ता गर्ने भन्दै ६ बजे नै कार्यालय पुगेका थिए । एमाले नेता कृष्णगोपाल श्रेष्ठले आयोगको मूल गेटभन्दा बाहिर जो पहिले आए पनि कार्यालय भित्र एमाले पहिलो लाइनमा बसेको दावी गरे । एमाओवादी प्रवक्ता अग्निप्रसाद सापकोटाले एमाओवादीका कार्यकर्ता बिहानै लाइनमा बसेको बताए ।

प्रमुख दलहरुबाट दल दर्ताका लागि उच्च तहका नेताहरु कार्यालय पुगेका छन् ।

——————————————————————————————————————-

को पहिलो भन्नेमा एमाले र एमाओवादीमा विवाद

मंगलबार , १७ वैशाख २०७० ११:३० एम

निर्वाचन आयोगमा दल दर्ता गराउन पुगेका नेकपा एमाले र एमाओवादी बीच कसले पहिले दर्ता गराउने भन्ने विवाद भएपछि अहिलेसम्म कुनै दल पनि दर्ता हुन सकेका छैनन् ।

आयोगको कार्यालय ९ बजे खुल्ने भए पनि त्यसभन्दा तीन घण्टा अघि नै एमाले र एमाओवादीका नेता कार्यकर्ताहरु निर्वाचन आयोगमा पुगिसकेका थिए । अहिले एमाले र एमाओवादी दुबैले आफू पहिले आएको दाबी गर्दै पहिलो दर्ता गराउन पाउनुपर्ने माग गर्दै आएका छन् ।

विवादले झडपको रुप लिन थालेपछि निर्वाचन आयोगमा ब्यापक रुपमा प्रहरी परिचालन गरिएको छ ।

निर्वाचन आयोगको दल दर्ता गराउने झ्यालको एकातर्फ आफ्ना कार्यकर्ताहरुका साथ एमाले उपाध्यक्ष वामदेव गौतम बसिरहेका छन् भने अर्को तर्फ एमाओवादी नेतृ हिसिला यमी दलबलका साथ उभिएकी छन् ।

एमाले अध्यक्ष झलनाथ खनाल र एमाओवादी उपाध्यक्ष बाबुराम भट्टराई भने निर्वाचन आयोगका पदाधिकारीसँग समस्या समाधानका लागि वार्ता गरिरहेका छन् ।

सबै भन्दा पहिले दर्ता गराउँदा र दोस्रोमा दर्ता गराउँदा के फरक पर्छ भन्दा एमाओवादीका नेता देवेन्द्र पौडेलले अरु खासै फरक नपर्ने तर कार्यकर्ताहरुको मनोविज्ञानमा असर पर्ने वताए । “कुरा मनोविज्ञानको मात्रै हो, ठूलो समस्या छैन” उनले भने, “कुरा मिल्छ होला ।”

यो समाचार तयार पार्दासम्म एमाले र एमाओवादीबीच वार्ता चलिरहेको छ भने नेपाली कांग्रेस लगायत अन्य दलहरु पनि आयोगमा दल दर्ताका लागि पुगिसकेका छन् ।

प्रतिकृया दिनुहोस