फाइल तस्बीर

१७ बैशाखबाट शुरु भएको कक्षा १२ को परीक्षामा तीन लाख ९८ हजार ११५ जना सहभागी भएको परिषद्का सदस्यसचिव भीमलाल गुरुङले जानकारी दिएका छन् ।

कुल परिक्षार्थीहरु मध्ये एक लाख ९३ हजार ३६४ छात्र र दुई लाख चार हजार ७५१ छात्रा छन् । परीक्षाका लागि देशभर ९३२ परीक्षा केन्द्र र ३० हजार ६०० जनशक्ति परिचालन गरिएको छ ।

परिषद्का परीक्षा नियन्त्रक दुर्गा अर्यालले परीक्षामा अर्मयादित कार्य गर्ने केन्द्राध्यक्ष, सहायक केन्द्राध्यक्ष, सुरक्षा गार्ड, जोकोहीलाई ६ महिना कैद वा रु एक लाख जरिवाना वा दुवै सजाय हुने व्यवस्था गरिएको जानकारी दिए ।

परीक्षार्थीले परीक्षा नै अवरुद्ध गर्ने जस्ता गतिविधि गरेमा दुई वर्षसम्म परीक्षा दिन नपाउने गरी निलम्बन गरिने व्यवस्था गरिएको छ । परीक्षा वैशाख २९ गते सम्पन्न हुनेछ ।

नक्कली परीक्षार्थी भेटिएमा सार्वजनिक ऐनअन्तर्गत मुद्दा लगाइने भएको छ । परीक्षा अवधिभर परीक्षा केन्द्रमा परीक्षार्थी र निरीक्षकलाई मोबाइल फोन लैजानसमेत प्रतिबन्ध गरिएको छ ।

परीक्षा शान्ति पूर्णरुपमा सम्पन्न गर्न परिषद्ले सुरक्षा निकायसँग विशेष बैठक गरी सुरक्षा व्यवस्था कडा पारिएको परिषद्का उपसचिव सन्तोषकुमार आचार्यले बताए ।
रासस

प्रतिकृया दिनुहोस