सोलुखुम्बु पुगेका भारतीय नागरिक सुदन सु चिन्तमणि पानसेले बाटोमा हराएको नगद २१ हजार भारतीय रुपैयाँ, सोनी क्यामरा, डेबिट तथा भिसा कार्ड, पेन ड्राइभ, पर्स र डायरी समेतको सामान भेट्ने लीला अन्जना खत्रीले उक्त सामानहरु १७ बैशाखमा फिर्ता गरेकी छन् ।

अन्जनाका श्रीमान् इन्द्रहाङ लिम्बूखिमले लुक्लामा प्रहरीको अगुवाइमा स्थानीय बुद्धिजीवी, नागरिक समाजका प्रतिनिधि, पत्रकार लगायतको उपस्थितिमा भारतीय नागरिक पानसेलाई नगद र सबै सामानहरु बुझाएका हुन् ।

सोलुखुम्बुको फाक्दिन निवासी लीला अन्जना खत्रीले १६ बैशाखमा आमालाई उपचारका लागि लुक्ला अस्पताल लिई आउने क्रममा चौरीखर्क–२ क्याङ्मा रहेको ठूलो रूखमुनि नगदसहित उक्त समानहरु बेवारिसे अवस्थामा फेला पारेकी थिइन् ।

लीला अन्जनाले सामान भेट्टाएको बारे उनका श्रीमान् लिम्बूखिमले प्रहरीलाई फोनमार्फत जानकारी गराएका थिए । जानकारीपश्चात् इलाका प्रहरी कार्यालयको टोलीले निजको घरमा गई सामानहरु जिम्मा लिएको थियो ।

सामान बुझेपछि भारतीय नागरिक पानसेले नेपाली र भारतीय जनताबीच भाइभाइको सम्बन्ध रहेको भन्दै नेपाली जनताको इमान्दारी खुशी व्यक्त गरेका छन् । उनले सामान बुझाउने इन्द्रहाङलाई खादा लगाएर सम्मान गर्दै प्रशंसास्वरुप केही नगदसमेत दिएका छन् ।
रासस

प्रतिकृया दिनुहोस