२२ बैशाखमा बसेको संवैधानिक परिषदको बैठकले विवादास्पद छवी भएका शाही कालका पूर्व मूख्य सचिव लोकमान सिंह कार्कीलाई अख्तियार दुरुपयोग अनुसन्धान आयोगको प्रमुख आयुक्तमा नियुक्त गर्न सिफारिस गरेको छ ।

त्यसैगरी परिषदले लोक सेवा आयोगमा कयोदेवी यमीलाई सिफारिस गरेको छ । यमी एमाओवादी उपाध्यक्ष बाबुराम भट्टराईकी जेठीसासु हुन् । त्यस्तै महालेखा परीक्षकमा भानुप्रसाद आचार्यको नाम सिफारिस भएको छ ।

यसअघि एमाओवादी, कांग्रेस, एमाले र मधेशी मोर्चाका शीर्ष नेताहरु संलग्न उच्चस्तरीय राजनीतिक समितिले अख्तियार प्रमुखमा लोकमान सिंह कार्कीको नाम सिफारिस गरेको भए पनि पछिल्लो समयमा नेपाली कांग्रेस र नेकपा एमालेले कार्कीलाई अख्तियार प्रमुख बनाउने सिफारिस कार्यान्वयन हुन नदिने बताउँदै आएका थिए भने एमाओवादीले लोकमान पक्षमा पैरवी गर्दै आएको थियो ।

मन्त्रिपरिषद अध्यक्ष खिलराज रेग्मी अध्यक्ष रहेको परिषदका सदस्यहरुमा कामु प्रधानन्यायाधीश दामोदर शर्मा, मन्त्रीत्रय माधव पौडेल, माधव घिमिरे र रिद्धिबाबा प्रधान छन् ।

परिषदको सिफारिसलाई अन्तिम रुप दिन राष्ट्रपतिले अनुमोदन गर्नु पर्ने ब्यवस्था छ ।

अलोकतान्त्रिक कदम
नेपाल बार एशोसिएसनका उपाध्यक्ष टिकाराम भट्टराईले अख्तियारमा लोकमानसिंह कार्कीको सिफारिसलाई अलोकतान्त्रिक र असंवैधानिक कदम भएको प्रतिक्रिया ब्यक्त गरेका छन् ।

“संविधानले तोकेको योग्यता विपरितका व्यक्तिलाई संवैधानिक परिषदले अख्तियार प्रमुखमा सिफारिस गर्नु असंवैधानिक कार्य हो,” भट्टराईले भने, “यसले जनआन्दोलनको जनादेशलाई उल्लंघन गरेको छ र गणतन्त्रलाई कमजोर पार्ने काम भएको छ ।”

उनले कार्कीको सिफारिसालाई प्रतिगमनलाई बलियो पार्ने काम भएको पनि टिप्पणी गरे ।

को हुन् लोकमानसिंह कार्की ?

लोकमानसिंह कार्की पूर्व राजा ज्ञानेन्द्र शाहको शासन कालमा मुख्यसचिव भएका व्यक्ति हुन् । अरु वरिष्ठतम सचिवहरु हुँदा हुँदै पनि मर्यादाक्रम मिचेर  उनलाई मुख्यसचिव बनाइएको थियो ।

त्यसपछि गिरिजाप्रसाद कोइराला प्रधानमन्त्री भएपछि उनलाई मुख्यसचिवबाट फिर्ता बोलाइएको थियो । राजा वीरेन्द्रको हुकुम प्रमांगीबाट सिधै उपसचिवमा नियुक्ति पाएका कार्की राजपरिषद् स्थायी समितिका तत्कालीन सभापति भुपालमानसिंह कार्कीका छोरा हुन् ।

रायमाझी आयोगले कार्कीलाई जनआन्दोलन २०६२/२०६३ दबाउन भूमिका निर्वाह गरेको भन्दै दोषि ठहर गरेको छ भने अख्तियार दुरुपयोग अनुसन्धान आयोगले उनलाई सरकारी सेवाका लागि अयोग्य ठहर गरेको छ ।

प्रतिकृया दिनुहोस