नवलपरासीको मैनाघाटस्थित सरस्वती उच्चमाविमा नागरिकता वितरणका लागि खटिएका एकीकृत घुम्ती टोलीलाई लक्षित गरेर राखिएको दुई वटा तुल बम फेला परेको छ ।

विद्यालयको कार्यालय र कक्षा सातको कोठामा २६ बैशाखमा तुल बम फेला परेको स्थानीय अर्जुन पंगेनीले जानकारी दिए । बम ढोकामा सुतली र तारले बेरेर राखिएको छ ।

चार दलीय गठबन्धनको विरोध र ३५ लाख भारतीयलाई नागरिकता दिने षडयन्त्रविरुद्ध बम राखिएको पर्चा भेटिएको घुम्ती टोलीका संयोजक टिकाराम वाग्लेले बताए ।

जिल्ला प्रशासन कार्यालय नवलपरासीले १८ बैशाखदेखि जिल्लाका विभिन्न भागमा फोटो सहितको मतदाता नामावली संकलन र नागरिकता वितरणका लागि घुम्ती शिविर सञ्चालन गरेको छ ।

त्यस्तै पर्रोहामा विद्यालय हाताभित्र बम फेला परेपछि कक्षा १२ को परीक्षा झन्डै एक घण्टा प्रभावित भएको थियो । भवनको द्वारमा बम भेटिएपछि बिहान सात बजे शुरु हुनुपर्ने परीक्षा झन्डै एकघन्टा ढिलो अर्को भवनमा सञ्चालन गरिएको विद्यालयले जनाएको छ ।

विद्यालयमा प्रेसर कुकर बम फेला परेपछि परीक्षाका लागि पुगेका विद्यार्थीहरु त्रसित भएका थिए । अहिले प्रहरीको सुरक्षामा परीक्षा सञ्चालन भइरहेको छ ।

बम कसले राख्यो भन्नेबारे थाहा नभएको र अनुसन्धान जारी रहेको ईलाका प्रहरी कार्यालय बुटवलका प्रहरी नायब उपरीक्षक राजकुमार बैदवारले जानकारी दिए । उनका अनुसार नेपाली सेनाको वम डिस्पोजल टोलीले परीक्षा सकिएपछि बम डिस्पोज गर्दै छ ।

विद्रोही गिरी, नवलपरासी

प्रतिकृया दिनुहोस