बंगलादेशमा पाँचवटा जति साना ठूला गारमेन्ट कारखाना रहेको आठतले भवन ११ बैशाख बिहान भत्किंदा मृत्यु हुनेहरुको संख्या अहिलेसम्म ९१२ पुगेको छ ।

भत्केको भवनमा १६ दिनसम्म पनि उद्दार कार्य जारी नै छ । भवनको भग्नाबशेषबाट गएराति करिब १३० वटा शव निकालेपछि सो सङ्ख्या ९१२ पुगेको सैनिक स्रोतले जनाएको छ ।

२५ बैशाख बिहानसम्म्म सो भत्किएको भवनमा ज्यान गुमाउनेको सङ्ख्या ७८२ पुगेको थियो ।

दुर्घटनाका बेला उक्त भवनमा कम्तीमा पनि तीन हजार ब्यक्तिहरु थिए जसमध्ये दुई हजार ४३७ को भने शुरुमै उद्धार गरिएको थियो ।

त्यहाँ अझै पनि उद्धार कार्य जारी रहेको र मृतकको सङ्ख्या बढ्न सक्ने सैनिक स्रोतले अनुमान गरेको छ ।

दुर्घटनाको विरोधमा राजधानी ढाकामा हजारौँ नागरिकको विरोध गरिरेहका छन् । उनीहरुले उक्त भवन बनाउने मालिक तथा इञ्जिनियर र तयारी पोशाक सञ्चालन गर्ने मालिकलाई मृत्युदण्डको कारबाहीको माग गरेका छन् ।

भवन भत्किएको विषयमा सरकारी एक उच्च टोलीले अनुसन्धान थालेको छ । प्रारम्भिक रुपमा सो छानबिनबाट भत्किएको भवन कारखानाका लागि तयार नगरिएको पाइएको छ ।

उक्त भवन कारखानाका लागि नभएर अन्य व्यापारिक प्रयोजनका लागि तयार गरिएकोले उक्त घटना भएको प्रारम्भिक अनुसन्धानमा खुलेको सो समूहमा कार्यरत एक इञ्जिनियरले जानकारी दिएका छन् ।

यस बाहेक अन्य परिणामहरु बाहिर नआएको स्थानीय सञ्चारमाध्यमहरुले जनाएको छन् ।

यसै अनुसन्धानको क्रममा प्रहरीले भवनका मालिक सहेल राना र चार गार्मेटका संस्थापकलागायत १२ व्यक्तिलाई पक्राउ गरेको छ ।

बङ्गलादेशमा गत नोभेम्बरमा एक गार्मेट भवनमा भएको आगलागीमा परी १११ व्यक्तिको मृत्यु भएको थियो । त्यहाँ यस्ता घटना निकै हुने गरेका छन् ।

अर्को गार्मेन्टमा आगलागी हुँदा आठको मृत्यु

बङ्गलादेशको राजधानी ढाकामा अवस्थित एघार तले एक भवनमा रहेको गार्मेट कारखानामा २५ बैशाखमा आगलागी हुँदा कम्तीमा आठ व्यक्तिको मृत्यु भएको प्रहरी स्रोतले जनाएको छ ।

यस आगलागीबाट घाइते भएका दर्जनौ व्यक्तिलाई उपचारार्थ अस्पताल भर्ना गरिएको समाचारमा उल्लेख छ ।

स्थानीय समयअनुसार २५ बैशाख राति ११ बजे सो आगलागी शुरु भएको अधिकारीहरुले जनाएका छन् ।

बङ्गलादेश तयारी पोशाकका सामान निर्यात गर्ने विश्वकै एक प्रमुख राष्ट्रको रुपमा पर्दछ ।

त्यहाँ गार्मेट कारखानामा करिब ४० लाख कामदारहरु कार्यरत रहेका जनाइएको छ । त्यसैगरी अरबौँ अमेरिकी डलर बराबरको लगानी सो क्षेत्रमा रहेको पनि बताइएको छ ।

एएफपी, सिन्ह्वा

प्रतिकृया दिनुहोस