न्युजिल्यान्डमा रक्सीको मातमा रेष्टुरेन्टमा काम गर्ने ‘वेटर’लाई दुव्र्यवहार गर्ने सांसदले राजीनामा दिएपछि प्रधानमन्त्री जोन कीले राजीनामा दिएको कुरालाई स्वागत गरेका छन् ।

नेसनल पार्टीका सांसद एरोन गिलमोरले आइतबार राति सांसद पदबाट राजिनामा दिने घोषणा गरेका हुन् । गत महिना उनले साउथ आइल्यान्डको एक रेस्टुराँमा खाना खाँदा टन्नै मदिरापान गरेका थिए ।

‘‘मैले गल्ती गरेँ । म पनि मानिस नै हुँ’’, गिलमोरले पत्रकारहरूलाई बताए । उनले आफ्नो सत्यनिष्ठामाथि आक्रमण भएको, त्यसले आफ्ना वरपरका व्यक्तिहरूमाथि चोट पुग्न थालेको र यो उनीहरूप्रति उचित कार्य नभएको बतए ।

गिलमोरसँगै खाना खान बसेका वकिल एन्ड्र्यु रिचेजले सांसदले उनलाई थप मदिरा दिन नमान्ने वेटरसँग विवाद गरेको र अपशब्द बोलेको बताए ।

विवादका क्रममा गिलमोरले प्रधानमन्त्रीको कार्यालयलाई भनेर यी वेटरको जागिर खोसिदिने धम्की दिएको र यी वकिलले पछि यसका लागि रेस्टुराँसँग माफी माग्नुपरेको बताइएको छ ।

गिलमोरले रिचेजका आरोपलाई अस्वीकार गरेपनि आफू मदिराका कारण मातेको तथा ‘वेटर’ प्रति उग्र तथा रुखो भएको स्वीकार गरेका छन् ।

गिलमोरले सुरूमा राजिनामा दिन अस्वीकार गरे पनि उनले आफूलाई प्रधानमन्त्रीको समर्थन नरहेको देखेपछि राजिनामा दिएका हुन् ।

प्रधानमन्त्री कीले टीभीएनजेलाई यी सांसदको व्यवहार उचित नभएको दलको धारणा रहेको बताएका छन् ।

गिलमोरलाई नेसनल पार्टीका अर्का एक सदस्यबाट प्रतिस्थापन गरिने र यसबाट गठबन्धन सरकारमा कुनै प्रभाव नपर्ने बताइएको छ ।
एएफपी

प्रतिकृया दिनुहोस