निर्वाचन आयोगले निर्वाचनसम्बन्धी ऐन संशोधनमा डेढ प्रतिशत ‘थ्रेसहोल्ड’ को प्रस्ताव एमाओवादी र मधेशवादी लगायत साना दलहरुले त्यसको विरोध गरिरहेको बेला नेपाली कांग्रेसका सभापति सुशील कोइरालाले ‘थ्रेस होल्ड’ अनिवार्य राख्नु पर्ने बताएका छन् ।

४ जेठमा पोखरामा भएको कार्यक्रममा सभापति कोइरालाले विश्वका अन्य मुलुकहरुमा समेत थ्रेसहोल्ड को नियम भएको भन्दै कांग्रेस आफ्नो अडानबाट पछि नहट्ने बताए । उनले संविधान सभामा समानुपातिक तर्फबाट प्रतिनिधित्व गर्न खसेको कुल मतसंख्याको एक प्रतिशत मत ल्याउनुपर्नेेमा जोड दिए ।

“शंका नगरौ, चुनाव हुन्छ हुन्छ,” कोइरालाले भने, “चुनावमा प्रजातन्त्रवादीको विजय सुनिश्चित छ ।” प्रजातन्त्रको प्राण चुनाव भएकोले यसलाई प्रभावित पार्ने गरी कुनै पनि गतिविधि नगर्न उनले सबैलाई आग्रह गरे । उनले भने, “प्रजातन्त्रसँग निहुँ खोज्नेहरु अन्त्य भएको इतिहास छ ।”

निर्वाचनलाई प्रभाव पार्ने गरी तत्कालिन भट्टराई सरकारले गरेका राजनीतिक नियुक्ति खारेज गर्नुपर्ने कांग्रेसको अडान रहेको पनि उनले सुनाए ।

कोइरालाले आफू नचाहँदा पनि अख्तियार प्रमुखमा लोकमान सिंह कार्की नियुक्त भएको दाबी गर्दै थपे, “ग्राण्ड डिजाइन अनुसार नै नियुक्त भएको हो ।”

३ जेठ साँझ भएको चार दल सम्मिलित उच्चस्तरीय राजनीतिक समितिको बैठकमा नेपाली कांग्रेस र एमालेले भट्टराई सरकारले गरेका नियुक्तिको खारेजी र थ्रेसहोल्डका पक्षमा अडान राखेपछि बैठक बिना निष्कर्ष टुंगिएको थियो ।
माधव बराल, पोखरा

प्रतिकृया दिनुहोस