नवलपरासीको लोकाहा खोलामा आएको बाढीले बगाएको डाइभर्सन । गएको असोजमा पुल भाँचिएपछि डाइभर्सन बनाइएको थियो । अहिले अस्थायी डाइभर्सन बनाएर यातायात सुचारु भइसकेको छ । तस्बीर: विद्रोही गिरी, नवलपरासी

५ जेठदेखि परेको पानीले नवलपरासीको लोकाहा खोलाको डाइभर्सन बगाएपछि डाइभर्सन भन्दा करिब चार सय मिटर तलबाट एउटा डाइभर्सन र अर्को भत्केको डाइभर्सन पुन निर्माण गरेर राजमार्गमा सवारी सुचारु गरिएको छ ।

७ जेठ बिहानै डाइभर्सन बगाएपछि पुर्वपश्चिम राजमार्गमा सवारी साधन सञ्चालन भएका थिएनन् । खोला वारी र पारीका सवारी साधनले पैदलबाट खोला तर्नेहरुलाई नारायणगढ – बुटवल लगेका थिए । अहिले डाइभर्सनबाट एकतर्फी मात्र सवारी साधन सञ्चालन गरिएकोमा ८ जेठ दिउँसोदेखि दुबै तर्फबाट सवारी साधन सञ्चालन हुने गरी डाइभर्सन तयार हुने सडक डिभिजन कार्यालय बुटवलका इन्जिनियर नरेन्द्र भट्टले जानकारी दिए ।

बाढीले बगाएर ल्याएका झ्याङ्ग र ढुंगाले ह्युमपाइपमा बुजो लागी डाइभर्सन भत्केको थियो । पक्की पुल जेठ भित्र सम्पन्न नभए बर्षामा दुख पाउने भएकाले जेठ भित्रै मर्मत सम्पन्न गर्न स्थानीयले माग गरेका छन् ।

डाइभर्सनको भर परे बर्षामा सास्ती मात्र वेहोर्न पर्ने स्थानीय दिपक शर्माले बताए ।
विद्रोही गिरी, नवलपरासी

प्रतिकृया दिनुहोस