सदभावना पार्टीले आह्वान गरेको मधेश वन्दले मधेशको जनजीवन प्रभावित बनेको छ ।

१२ जेठमा वीरगंजवाट सिमेन्ट र प्लाष्टीकको पाईप लिएर जलेश्वर तर्फ जाँदै गरेको ना २ ख ६३३३ नम्बरको ट्रकलाई नवलपुर लालबन्दीको वीचमा पर्ने जंगल नजिक सदभावना पार्टीका कार्यकर्ताहरुले बिहान करिब १० बजे आगजनी गरेका छन् । आन्दोलनकारीले दुई वटा यात्रु बाहक बसमा समेत तोडफोड गरेका छन् ।

आगजनीपछि ट्रक पूर्णरुपमा ध्वस्त भएको छ । प्रहरीले जल्दै गरेको ट्रकवाट केही सामान निकालेपनि आधा भन्दा बढी सामान खरानी भएको छ ।

राजमार्ग बन्द गराउन सडकमा बसेका कार्यकर्तालाई प्रहरीले लाठी चार्ज गरी हटाएको छ भने जिल्ला अध्यक्ष प्रमोद साहलगायत ९ जनालाई प्रहरीले नियन्त्रणमा लिएको छ । प्रहरीको लाठी प्रहारबाट राजेश भण्डारी, लक्ष्मी सिंह, रामकैलाश साह र देवानन्द पासवान घाईते भएका छन् । जिल्ला अध्यक्षसमेतलाई प्रहरीले नियन्त्रणमा लिएपछि आक्रोशित कार्यकर्ताले जंगलमा ट्रक रोकी आगो लगाएका हुन् ।

ट्रकका चालक गफुर मियाँले जंगलवाट ८/९ जना युवाहरु निस्केर ट्रक रोक्न लगाई पेट्रोल छर्केर आगो लगाएको वताए ।

सप्तरीमा सास्ती
भोक हड्तालमा बसेका अध्यक्ष राजेन्द्र महतोलाई प्रहरीले बलजफ्ती अस्पताल पुर्‍याएको बिरोधमा सद्भावना पार्टीले गरेको मधेश बन्दले सप्तरी, सिरहा, सर्लाही सहित मधेशका जिल्लाहरुमा यातायात ठप्प छ भने उद्योग, कलकारखाना, शैक्षिक संस्था समेत बन्द रहेको छ ।

पूर्व सभासद् सदरुल हकको हत्यापछि चारदिनसम्म बन्द रहेको सप्तरी खुलेको एक दिन नबित्दै सद्भावनाले बन्द गरेपछि जिल्लाको जनजीवन कष्टकर बनेको छ ।

वीरगञ्जमा आंशिक प्रभाव
सद्भावना पार्टीले गरेको बन्दको वीरगञ्जमा आंशिक प्रभाव परेको छ ।

बन्दका कारण वीरगञ्जमा चल्ने लामो दुरीका सवारी साधनहरु ठप्प भएका छन् भने तर, वीरगञ्जको मुख्य बजार र पसलहरु खुल्ला नै छन ।

वीरगञ्ज बजारक्षेत्रमा टेम्पो, मोटरसाईकल, रिक्सा, टाँगाहरु यथावत रुपमा चलिरहेका छन् ।

वीरगन्ज पथलैया र कलैया वीरगन्ज सडकखण्डमा भने आज अन्य दिनको तुलनामा सवारी संख्या पातलिएको छ ।
बाराको कलैयामा पनि बन्दको आंशिक प्रभाव परेको छ ।

विश्वनाथ ठाकुर (सर्लाही), श्रवणकुमार देव (सप्तरी) र विम्मी शर्मा (वीरगञ्ज)

प्रतिकृया दिनुहोस