एकान्त कुमारी श्रीया बज्राचार्यको गत १९ वैशाखमा साढे ११ वर्षको उमेरमा बेलविवाह गरिएपछि रिक्त कुमारी पदका लागि कुमारीको खोजी भइरहेको तलेजुका मूल नाइके नरेन्द्र जोशीले बताएका छन् ।

कक्षा २ मा पढ्दै गर्दा सात वर्षको उमेरमा एकान्त कुमारी भएकी बज्राचार्य साढे ११ वर्षको भएपछि ज्योतिषले दिएको साइतअनुसार बेल विवाह सम्पन्न भएको थियो ।

तलेजुका मूल नाइके नरेन्द्रप्रसाद जोशीले एकान्त कुमारी श्रीयाले बेल विवाहपछि अवकास पाएकोले कुमारीको खोजी भइरहेको जानकारी दिए ।

भक्तपुरको बज्राचार्य वा शाक्य वंशीय कन्या मात्र कुमारी हुनुपर्ने र कुमारी हुने कन्या सबै गुणले सम्पन्न, कुनै दाग, घाउचोट नलागेको हुनुपर्ने, अपाङ्ग भएको नहुने र कुमारी बन्न इच्छुक कन्यालाई परिवारको स्वीकृतिमा कुमारीको फूल टाउकोमा राखेपछि बिरामी नपरेमा यस्ती कन्यालाई कुमारीको लागि छनोट गरिने परम्परा रहेको जोशीले बताए ।

कुमारीको लागि उपयुक्त कन्या खोजेपछि तलेजुका मूल नाइकेले उपयुक्त ठह¥याई सिफारिस गरेपछि गुठी संस्थानले ती कन्यालाई एकान्तकुमारीमा नियुक्ति गर्ने परम्परा रहेको छ ।

बहालवाला कुमारीलाई कौशितोखानाबाट रु दुई हजार २५० र गुठी संस्थानबाट रु ४५० गरी रु दुई हजार ७०० मासिक भत्ता दिइने व्यवस्था भएको र कुमारीबाट अवकाश पाएपछि पूर्वकुमारीलाई कौशितोखानाबाट रु एक हजार र गुठी संस्थानबाट रु १०० गरी मासिक रु एक हजार १०० पारिश्रमिक दिने व्यवस्था भएको पनि जोशीले जानकारी दिए ।

अहिले पूर्वकुमारीका रुपमा पारिश्रमिक पाउनेमा पूर्वकुमारीहरु गीता वज्राचार्य, पद्मसुमना शाक्य, निलम वज्राचार्य, सजनी शाक्य र श्रीया वज्राचार्य रहेका छन् ।
रासस

प्रतिकृया दिनुहोस