काठमाडौंमा आयोजित एक साक्षात्कार कार्यक्रममा नेकपा–माओवादीका सचिव देव गुरुङले चार दलले मुलुकलाई बन्धक बनाउन खोजेको भन्दै यसका विरुद्ध आफ्नो पार्टी चुप लागेर नबस्ने बताए ।

नेपाली काग्रेसका केन्द्रीय सदस्य डा रामशरण महतले नियन्त्रणभन्दा बाहिर जान लागेको राजनीतिलाई आगामी चुनावले सही ठाउँमा ल्याउने विश्वास व्यक्त गरे । उनले आन्दोलनरत राजनीतिक दललाई यो भएन, ऊ भएन भनेर अड्को थाप्ने काम नगर्न आग्रह गर्दै सर्वदलीय बैठक बस्न आफूहरु तयार रहेको तर चुनाव भने गराएरै छाड्ने दृढता व्यक्त गरे ।

एमाओवादीका पोलिटब्युरो सदस्य देवेन्द्र पौडेलले सबै राजनीतिक दलले आ–आफ्नो हैसियत के हो भनेर बुझ्न पनि चुनावमा जानैपर्नेमा जोड दिए ।

उनले भने, “एजेन्डा मिलेका पार्टीहरुबीच मोर्चा बनाएर जाने कुरामा आफ्नो पार्टी तयार छ ।”

नेकपा एमालेका सचिव युवराज ज्ञवालीले अब पनि चुनाव नभए दिगो शान्ति नहुने र पुनः अर्को द्वन्द्वमा मुलुक फस्ने चेतावनी दिए । सम्भव भएसम्म लचिलो भएर आन्दोलनमा रहेका राजनीतिक दलका मागलाई सम्बोधन गर्नेतर्फ प्रमुख दल र सरकार लाग्नुपर्ने भन्दै उनले कुनै पनि दललाई अपमानित गर्ने वा किनारा लगाउने काम गर्न नहुने बताए ।

राजनीतिक विश्लेषक सोनाम छिरिङ शेर्पाले राष्ट्रियता जोगाउन भए पनि चुनाव गर्नैपर्ने भएकाले सबै राजनीतिक दल मिलेर ४ मंसीरको चुनाव सफल बनाउनुपर्ने बताएका थिए ।

प्रतिकृया दिनुहोस