शैला रानी रावत
विधायक, केदारनाथ, भारत

भारतको उत्तराखण्डमा आएको बाढीले ल्याएको विपत्तिपछि केदारनाथकी कांग्रेस विधायकले आफ्नै पार्टीको सरकारले जनतालाई बेवास्ता गरेको आरोप लगाएकी छन् ।

केदारनाथमा जब जल–प्रलय आयो त्यसबेला मैले शासन–प्रशासनलाई दोस्रो दिन नै एक हजार व्यक्ति वेपत्ता भएको वा जल–प्रलयमा बगेको बताएकी थिएँ, तर सरकारले मेरो कुरा सुनेन ।

मेरो आफ्नै जिल्लाका कम्तीमा पनि १२०० व्यक्तिको ज्यान गएको छ तर सरकारले गलत तथ्याङ्क प्रस्तुत गरिरहेको छ । उदेक लाग्दो कुरा, यति धेरै मान्छे मारिएका छन् र तपाई झूठो तथ्याङ्क प्रस्तुत गर्दै हुनुहुन्छ ।

म त्यहाँकी विधायक हुँ र सरकारले आजसम्म मसँग कुनै छलफल गरेको छैन, न त क्षेत्रका प्रभावित व्यक्तिहरुलाई कुनै सुविधा नै दिएको छ ।

प्रभावित व्यक्तिका परिवारहरुसँग म भेट्न गएँ, मानिसहरु रोइरहेका छन् । उनीहरुले आफन्त गुमाएका छन्, आफ्नो सम्पत्ति गुमाएका छन्, तर सरकार झुठो माथि झुठो बोलिरहेको छ ।

म त्यहाँकी विधायक हुँ र पूरै विश्वासका साथ भनिरहेकी छु मर्नेहरु १० हजारभन्दा बढी छन् ।

वास्तविकता
यिनीहरु बुझ्नै सक्दैनन्, हवाई यात्रा गर्छन । जमिनको कुरा र समस्या बुझ्नै सकेनन् । वास्तवमा सरकारसँग कुनै योजना नै छैन, कुनै एक्शन प्लान नै छैन ।

उनीहरु आउँछन्, हतारमा मिटिंग गर्छन् र फेरि आश्वासन दिएर जान्छन् ।

यहाँ अधिकारीहरुको तैनाती पनि ठिकसँग भएको छैन । प्रत्येक तीन महिनामा जिल्ला अधिकारी फेरिन्छन् । मैले पछिल्लो डेढ वर्षदेखि यसबारेमा सचेत गराउँदै आएकी छु तर सरकारले यी कुराहरुलाई कहिल्यै गम्भीरतापूर्वक लिएन ।

मैले दुई दिनअघि नै सेनालाई तैनात गराउनु पर्ने माग गरेकी थिएँ र यदि त्यसो गरिएको भए हामी दुई–तीन हजार मानिसलाई मृत्युको मुखबाट बचाउन सक्थ्यौं ।

प्रतिकृया दिनुहोस