१ बन्द गराउन नारायणगढ पुल्चोकमा हातमा लाठी लिएका वाइसीएल कार्यर्ता र सुनसान नारायणगढ बजार । तस्बीर: सविता श्रेष्ठ

पक्राउ परेका कार्यकर्ताहरुलाई १९ साउनसम्म छाड्ने आश्वासन पाएपछि अनिश्चितकालिन चितवन बन्द त्यतिञ्जेलसम्मका लागि लागि स्थगित गरिएको वाईसीएल चितवनका संयोजक ईश्वर सापकोटाले जानकारी दिएका छन् ।

प्रहरीले चार जनालाई चन्दा ऐन अन्तर्गत मुद्दा चलाउन भोली नै अदालत पेश गर्ने र सार्वजनिक अपराध ऐन अन्तर्गत अनुसन्धानमा रहेका दुई जनालाई आजै रातिसम्म छाड्ने सहमति भएको बुझिएको छ ।

बन्दको क्रममा वाइसीएल कार्यकर्ताहरुले भरतपुरमा ना २ च ४४८८ नम्बरको एम्बुलेन्स र रत्ननगरमा नेपाल टेलिकमको शाखामा तोडफोड गरेका छन्  । बन्दका कारण चितवनका सम्पूर्ण शैक्षिक संस्था, बजार, कलकारखाना र यातायत बन्द भएका थिए ।

प्रहरीले १५ साउन सांझ नारायणगढको पुतली बजार क्षेत्रमा चन्दा माग्दै गर्दा पक्राउ परेका भरत मगर, मधुराज न्यौपाने, मनोजकुमार शेर्पा र रवि पराजुलीलाई चन्दा ऐन अन्र्तगत र उत्तम गुरुङ र विशाल मरहठ्ठालाई केही सार्वजनिक अपराध ऐन अन्तर्गत मुद्दा चलाउन म्याद थप गराई अनुसन्धान अघि बढाएको छ ।

उनीहरुको अनुसन्धान चाँडै सकेर अदालत पेश गर्ने तयारी भैरहेको चितवनका प्रहरी उपरीक्षक प्रद्युम्न कार्कीले जानकारी दिएका छन् ।
सविता श्रेष्ठ, चितवन

——————————————————————————————————————
वाईसीएलद्वारा फेरि चितवन बन्द, एम्बुलेन्स तोडफोड

पक्राउ परेका कार्यकर्ता रिहाईको माग राख्दै एमाओवादीको युवा दस्ता वाईसीएलले १७ साउनमा गरेको चितवन बन्दमा एम्बुलेन्स तोडफोड गरेको छ ।

हिमालखबर
बिहीबार , १७ साउन २०७० ११:१६ एम

चन्दा उठाउँदै गरेका कार्यकर्तालाई १५ साउनमा प्रहरीले पक्राउ गरेको विरोधमा वाइसीएल चितवनले अनिश्चितकालिन चितवन बन्द गराएको छ । बन्दका कारण चितवनको बजार क्षेत्र, शैक्षिक संस्था, यातायात, उद्योग ठप्प छन् । नारायणगढको पुल्चोक, शहिदचोक, लायन्सचोक तथा चौबिसकोठी क्षेत्रमा बन्दकर्ताहरुले प्रर्दशन गरिरहेका छन् ।

बन्दकर्ताले भरतपुर १० मा पिप्ले रेडक्रस उपशाखाको ना २ च ४४८८ नम्बरको एम्बुलेन्समा तोडफोड गरेका छन् । पूर्वीचितवनको पिप्लेबाट बिरामी लिएर भरतपुर आउँदै गरेको एम्बुलेस बन्दकर्ताले तोडफोड गरेका हुन् । तोडफोडबाट एम्बुलेन्सको अगाडीको सिसा फुटेको छ ।

हेटौंडाबाट सार्वजनिक गाडीमा ल्याइएका गर्भवती बिरामी चितवन बन्दका कारण अलपत्र परेपछि उद्दार गरेर अस्पताल ल्याउँदै गर्दा वाईसीएल कार्यकर्ताले तोडफोड गरेको चालक कृष्णबहादुर नेपालीले जानकारी दिए । नेपाल रेडक्रस सोसाइटी उपशाखा पिप्लेको एम्बुलेन्समा ३ जना बिरामी रहको र ती सबै बीचबाटैमा अलपत्र परेपछि उद्दार गरिएको चालक नेपालीले बताए ।

“बसपार्क नजिकै आइपुगेपछि वन्दकर्ताहरुले रोकेर ‘यात्रु बोकेर हिड्ने’ भन्दै सिसा फोडिदिए” नेपालीले भने । वाईसीएल कार्यकर्ताले बीच सडकमै रोकेर तोडफोड गर्दापनि नजिकै रहेको प्रहरी मूकदर्शक बनेको चालकको गुनासो छ ।

१५ साउनमा नारायणगढ बजारमा ब्यापारीसँग चन्दा उठाउँदै गरेका ६ जना वाइसीएल कार्यकर्तालाई प्रहरीले म्याद थप गरी अनुसन्धान अघि बढाएको छ । नारायणगढको पुतली बजार क्षेत्रमा चन्दा माग्दै गर्दा पक्राउ परेका भरत मगर, मधुराज न्यौपाने, मनोजकुमार शेर्पा र रवि पराजुलीलाई चन्दा ऐन अन्र्तगत र उत्तम गुरुङ र विशाल मरहठ्ठालाई केही सार्वजनिक अपराध ऐन अन्र्तगत अनुसन्धान अघि बढाईएको जिल्ला प्रहरी कार्यालय चितवनका प्रहरी उपरिक्षक प्रद्युम्न कार्कीले जानकारी दिए ।

वाईसीएल चितवनले कार्यकर्ताको रिहाईको माग गर्दै १६ साउनमा पनि चितवन बन्द गरेको थियो । सर्वसाधारणलाई मर्का परेको भन्दै बन्द दुई घण्टामा फिर्ता लिएको थियो । त्यसको भोलीपल्ट आज पुनः एमाओवादी भ्रातृसंगठन वाइसीएलले पुनः अनिश्चितकालिन चितवन बन्दको आह्वान गरेको हो ।

सविता श्रेष्ठ, चितवन

प्रतिकृया दिनुहोस