बाधा अडकाउ फुकाउ सम्बन्धमा दायर रिटको सुनुवाई गत १६ साउनका लागि पेशी तोकिएको भए पनि दुई विपक्षी पदाधिकारीबाट लिखित जवाफ नआइपुगेकाले स्थगित गरिएको र १३ भदौका लागि पेशी तोकिएको सर्वोच्च अदालतका सहायक प्रवक्ता बाबुराम दाहालले बताएका छन् ।

कामु प्रधानन्यायाधीशसहित १० सदस्यीय विशेष इजलासमा बाधा अड्काउ फुकाउ आदेश र मन्त्रिपरिषद्का अध्यक्षविरुद्ध परेका २४ वटा रिट निवेदनमाथि २० असारमा भएको प्रारम्भिक बहसमा बाधा अड्काउ आदेश जारी भएपछि सो विवादसँग सम्बन्धित दायर सातवटा रिटमा मात्र सुनुवाइका लागि पेशी तोकिएको थियो ।

चौबीसवटा रिट निवेदनमध्ये १४ वटा संवैधानिक प्रक्रियासँग सम्बन्धित भएका र तीनवटा बाधा अड्काउ फुकाउ आदेश अघिका रिट निवेदन भएकाले ती बाँकी रिट निवेदनलाई भने छुट्टै इजलासमा हेरिने आदेश भएको थियो ।

विशेष इजलासबाट सुनुवाइ हुने भनिएका रिट निवेदनमा अधिवक्ता डा चन्द्रकान्त ज्ञवाली, कञ्चनकृष्ण न्यौपाने, डा गोपाल सिवाकोटी ‘चिन्तन’, सुवास आचार्य तथा जनसरोकार राख्ने ईश्वरी महतो, अमर केसी र भरतमणि जङ्गमका निवेदन थिए ।

रिट निवेदकमध्ये अधिवक्ता सुवास आचार्यको निवेदनका विपक्षी नेपाली काँग्रेसका सभापति सुशील कोइराला र गृह मन्त्रालयको समेत कार्यभार सम्हालेका तत्कालीन उपप्रधानमन्त्री विजयकुमार गच्छदारबाट लिखित जवाफ नआएकाले स्थगित गर्नुपरेको थियो ।

प्रतिकृया दिनुहोस