पार्टीको लेटरप्याडमा आधिकारिक पत्र पठाएर माओवादीले चुनाव बहिस्कार अभियानको लागि भन्दै दबाबमुलक रुपमा चन्दा उठाएको हो ।
बहिस्कार अभियानका क्रममा लाग्ने खर्च उठाउन बिभिन्न व्यक्ति तथा संघसस्थाबाट चन्दा संकलन शुरु गरेको माओवादीको भनाई छ । बिभिन्न सरकारी तथा गैरसरकारी संघसंस्थालाइ लेखेको पत्रमा माओवादीले चन्दा रकम समेत तोकेको छ ।

नेकपा–माओवादी जाजरकोटका सेक्रेटरी इमास्वर देवकोटाले हस्ताक्षर गरेको पत्र बिभिन्न संघसस्थाहरुमा पुगेको छ । पत्रमा ‘आगामी मंसिर ४ गते हुने संविधान सभाको निर्वाचन बहिस्कार गर्ने पार्टीको अभियानलाइ सफल बनाउन आर्थिक रकम सहयोग गरिदिन’ आग्रह गरिएको छ ।

माओवादीले १० हजारदेखि ५० हजार रुपैयाँसम्म तोकेर चन्दा मागेको पाइएको छ । आफुहरुसंग १६ हजार तोकेर चन्दा मागेको युवा जागरण तथा पुनस्थापना केन्द्र जाजरकोटका संयोजक सहदेव बस्नेतले बताए । त्यस्तै पाँचतारा युवा संरक्षक मञ्चसँग २० हजार रुपैयाँ चन्दा मागिएको छ । माओवादीले तोकेरै चन्दा मागेपछि कतिपय संघसंस्था, ब्यक्तिहरु समस्यामा परेका छन् ।

नेकपा–माओवादी भेरी कर्णाली राज्य समितिका सदस्य नरबहादुर गिरीले अभियान सञ्चालनका लागि सहयोग चाहिने भएकाले चन्दा उठाएको बताए । “अभियान सञ्चालन गर्त त कार्यकर्तालाई पाल्नु पर्‍यो नि” उनले भने ।

प्रमुख जिल्ला अधिकारी चक्रपाणि पाण्डेले भने यसबारे आफुलाइ कुनै संस्था र व्यक्तिले गुनासो नगरेको बताए । चन्दा संकलन निर्वाचन आचारसंहिता विपरीत भएकोले कतैबाट उजुरी आएमा कारवाही हुने उनको भनाई छ ।

राजेन्द्र कार्की
उज्यालो अनलाइनबाट साभार

प्रतिकृया दिनुहोस