२५ साउन विहानैदेखि चितवन बन्द गराएको चितवन कांग्रेसले केन्द्रको निर्देशनमा दिउँसो एक बजेदेखि बन्द फिर्ता लिएको कांग्रेस चितवन जिल्ला कार्य समितिका सचिव सुनिल श्रेष्ठले जानकारी दिएका छन् ।

बन्दले गर्दा सर्वसाधारणलाइ मर्का परेको र मुसलमानहरुको पर्व इद पनि आजै भएकोले  कांग्रेस केन्द्रीय कार्यालयले बन्द फिर्ता लिन निर्देशन दिएपछि बन्द फिर्ता लिइएको श्रेष्ठले बताए । श्रेष्ठका अनुसार पक्राउ परेका कार्यकर्ता छुटाउन केन्द्रले नै पहल गर्ने भएको छ ।

भारतीय सवारी चालकलाई कुटेको आरोपमा प्रहरीले नियन्त्रणमा लिई केही सार्वजनिक अपराध ऐन अन्तर्गत मुद्दा चलाएका तरुणदल भरतपुर नगर समिति उपाध्यक्ष प्रमिश राई र अर्का कार्यकर्ता यमबहादुर कार्कीको रिहाईको माग गर्दै कांग्रेसले २४ र २५ साउनमा चितवन बन्द आह्वान गरेको थियो ।
————————————————————————————————————————

कांग्रेसद्वारा चितवन दोस्रो दिन पनि बन्द

पक्राउ परेका कार्यकर्ता रिहाईको माग गर्दै नेपाली कांग्रेस चितवनले २५ साउन दोस्रो दिन पनि जिल्ला बन्द गराएको छ । लगातारको बन्दले चितवनको जनजीवन अस्तव्यस्त भएको छ ।

भारतीय नागरिकलाई कुटेको आरोपमा पक्राउ परेका आफ्ना कार्यकर्ता रिहाईको माग गर्दै २४ साउनमा नेपाली कांग्रेसको भ्रातृ संगठन तरुण दलले  चितवन बन्द गराएको थियो । २४ साउन ५ बजेसम्म कार्यकर्ताको रिहा गर्नुपर्ने अल्टिमेटम दिई दिउँसो तीन बजे बन्द फिर्ता लिएको कांग्रेसले कार्यकर्ता रिहा नभएपछि जिल्ला कांग्रेसको नेतृत्वमा २५ साउन विहानै देखि चितवन बन्द गराएको छ ।

वार्तामार्फत समस्या समाधान गर्न स्थानीय प्रहरी र प्रशासनले चासो नदिएपछि कार्यकर्ता रिहाईका लागि बन्द गर्नु परेको कांग्रेस चितवनका जिल्ला प्रवक्ता सजनकुमार महतोले जनाएका छन् ।

अहिले चितवनको नारायणगढ बजार क्षेत्रमा ठूलो संख्यामा सशस्त्र र नेपाल प्रहरी परिचालन गरिएको छ । बन्दले चितवन ठप्प छ भने पूर्वपश्चिम राजमार्ग हुँदै देशभर आउजाउ गर्ने सवारी साधनहरु सीमा क्षेत्रमा अलपत्र परेका छन् । लगातारको बन्दले चितवनका वासिन्दाहरु मर्कामा परेका छन् ।

सडकमा साइड नदिएको भन्दै भारतीय सवारी चालकलाई कुटेको आरोपमा प्रहरीले २३ साउनमा तरुणदल भरतपुर नगर समितिका उपाध्यक्ष प्रमिश राई र यमबहादुर कार्कीलाई पक्राउ गरेपछि उनीहरुको रिहाईको माग गर्दै कांग्रेसले चितवन बन्द गराएको हो ।

यसअघि १७ साउनमा चन्दा असुली गरिरहेको बेला पक्राउ परेका आफ्ना कार्यकर्ता रिहा गराउन वाइसीएलले चितवन बन्द गराएको थियो । बन्दपछि वाइसीएलका कार्यकर्ताहरु धरौटीमा रिहा भएका थिए ।

प्रतिकृया दिनुहोस