इजिप्टका अपदस्थ राष्ट्रपति मोहम्मद मोर्सीको मुस्लिम ब्रदरहुड पार्टीले निरन्तर आन्दोलन चर्काउँदै गएपछि त्यहाँको सेनाले गरेको कार्वाहीमा ६३८ जनाको मृत्यु भएको सरकारले जनाएको छ भने मृत्यु हुनेहरुको संख्या यो भन्दा कैयौं गुणा धेरै भएको मुस्लिम ब्रदरहुडको दाबी छ ।

सेनाको कार्वाहीपछि मुस्लिम ब्रदरहुडले वर्तमान सैन्य सरकारलाई हटाउनका लागि ठूलो प्रदर्शनको आयोजना गर्ने वताएको छ ।

इजिप्टको स्वास्थ्यमन्त्रालयका अनुसार गत बुधबार भएको सेनाको कार्वाहीमा मर्नेहरुको संख्या ६३८ पुगेको छ भने तीन हजारभन्दा बढी घाइते भएका छन् । मृत्यु हुनेमध्ये ४३ जना सुरक्षाकर्मी पनि छन् ।

सन् २०११ को अरब क्रांती पछि यति ठूलो संख्यामा एकै पटक मृत्यु भएको थिएन । ब्रदरहुडले दुई हजारभन्दा धेरै मारिएको र करिब १० हजार घाइते भएको दाबी गरेको छ ।

मोर्सी समर्थकहरुले शुक्रबारको नमाजपछि प्रदर्शनको आह्वान गरेका छन् । दुवै तर्फबाट पछि नहट्ने अडानले त्यहाँ थप हिंसा हुने र गृहयुद्ध सम्म हुनसक्ने संभावना बढेको छ । इजिप्टमा अहिले संकटकाल लागु भएको र प्रहरीलाई शान्ति सुब्यवस्था कायम राख्न हतियार प्रयोग गर्ने अधिकार दिइएको छ ।

इजिप्टको निकट सहयोगी अमेरिकाले त्यहाँ सेनाका तर्फबाट भएको हिंसाको निन्दा गरेको छ । राष्ट्रपति बाराक ओबामाले इजिप्टका सडकहरुमा नागरिकहरु मारिइरहेका बेला अमेरिका र  इजिप्टबीचको सम्बन्ध सामान्य नरहने बताएका छन् । यसका साथै अमेरिकाले इजिप्टसँग गर्ने संयुक्त सैन्य अभ्यास पनि रद्द गरेको छ ।

उता इजिप्टको सरकारले ओबामाको अभिव्यक्ति तथ्यमा आधारित नभएको र सशस्त्र समूहहरुलाई उक्साउने खाले भएको आरोप लगाएको छ । सरकारले यतिबेला आफूले आतंकवादीहरुको सामना गरिहेको दाबी गरेको छ ।

इजिप्टमा प्रदर्शनकारीहरुले इशाई र चर्चहरुलाई पनि निशाना बनाउन थालेका छन् ।

एजेन्सीहरुको सहयोगमा

प्रतिकृया दिनुहोस