धनगढी–डडेल्धुरा राजमार्गस्थित धनगढीदेखि झन्डै ७० किलोमिटरको दूरीमा रहेको फलटुडे बजारमा नेकपा–माओवादीका कार्यकर्ताले ट्रक चालकसँग चन्दा मागेपछिको विवाद बढदै जाँदा यातायात व्यवसायीसँग झडपसमेत भएको र केही घाइते भएको जिल्ला प्रहरी कार्यालय कैलालीले जनाएको छ ।

स्थिति नियन्त्रणमा लिन सामान्य बल प्रयोग गरिएको प्रहरी उपरीक्षक मोहन जोशीले बताएका छन् ।

काठ बोकेका चारवटा ट्रकका चालकसँग नेकपा–माओवादीका कार्यकर्ताले चन्दा माग गर्दै ट्रकको साँचो थुतेपछि दुवै पक्षबीचको विवादले उग्ररुप लिएको हो ।

अहिले घटनास्थलमा ठूलो सङ्ख्यामा प्रहरी परिचालन गरिएको छ । चन्दा माग गर्नेले चालकमाथि कुटपिट गरेको भन्दै विरोधमा यातायात व्यवसायीले चक्काजाम गरेपछि धनगढी–डडेल्धुरा राजमार्ग हुँदै गन्तव्यतर्फ हिँडेका कैयौँ सवारीसाधन बीचबाटामै रोकिएका छन् ।

प्रहरी उपरीक्षक जोशीले चन्दा माग गर्नेमध्येका दुईलाई प्रहरीले पक्राउ गरी ट्रकको साँचो नियन्त्रणमा लिएको बताए ।

प्रतिकृया दिनुहोस