एमाओवादी अध्यक्ष पुष्पकमल दाहालले वाइसिएललाई ‘उत्पादन ब्रिगेड’ का रुपमा देशभर सक्रिय बनाउने ७ भदौमा पोखराबाट घोषणा गरेका छन् ।

दाहालले पोखरामा ‘अन्नपूर्ण उत्पादन विग्रेड’ का संयोजक दिपक कोइरालालाई कृषि औजार हस्तान्तरण गरी ब्रिगेडको विधिवत घोषणा गरेका हुन् । यसअघि कोइरालाले तमुवानमा वाईसिएलको जिम्मेवारी सम्हालेका थिए ।

“हामी दोस्रंो संविधान सभा निर्वाचनको संघारमा छौ,” दाहालले भने, “यसलाई उत्पादन ब्रिगेडका रुपमा मात्र बुझ्न हुँदैन, चुनावी प्रचार टिमको काम पनि गर्छ, निष्पक्ष, स्वच्छ र धाँधलीरहित निर्वाचन गराउन ब्रिगेड सक्रिय रहनेछ ।”

उनले निर्वाचन र उत्पादनका दुबै कार्यलाई ‘फ्यूजन’ गराएर अगाडि बढन कार्यकर्तालाई निर्देशन दिए । उत्पादन ब्रिगेड शव्दावली हेटौडा महाधिवशेनबाट आएको भन्दै दाहालले थपे, “यो गम्भीर र रणनीतिक विषय पनि हो ।”

पोखरामा घोषणा गरिएको अन्नपूर्ण उत्पादन ब्रिगेडमा करिव दुई सय जना युवा समूहमा रहने बताइएको छ । यस्तै ब्रिगेडहरु देशभर र प्रत्येक निर्वाचन बुथमा सक्रिय बनाउने एमाओवादीको योजना छ ।

माधव बराल, पोखरा

प्रतिकृया दिनुहोस