रुकुमका दुर्गम गाविसहरु तकसेरा, हुकाम, मैकोट, स्यालाखदी, गोतामकोट, सिस्ने र जाङमा उत्पादन भएको स्याउ स्थानीय बजारमा दुई रुपैयाँ दाना बिक्रि भइरहेको छ भने सदरमुकाममा विदेशबाट आयातित स्याउको मूल्य प्रति दाना ३० देखि ५० रुपैयाँ सम्म छ ।

मकै खेति गर्ने जग्गामा स्याउ उत्पादन गरेर धेरै फाइदा लिने आशमा रहेका यहाँका किसानहरु स्याउले बजार नपाउँदा चिन्तित् भएका छन् । यसो हुनुको मुख्य कारण भनेको बजारसम्म स्याउ पुर्‍याउनका लागि ढुवानीको समस्या छ । सडक छैन, गाडि चल्ने कुरै भएन ।  भएको घोडेटो बाटो पनि बर्खाको पानी र पहिरोले ठाउँठाउँमा बगाइदिएको छ । यसै पनि  खच्चर र घोडामा ढुवानी गर्दा स्याउ थिच्चिएर बिग्रने  हुन्छ ।

“पाँच बर्षदेखि स्याउ फलाउन लागेको छु तर, अहिलेसम्म २० रुपैया किलोभन्दा बढी मूल्य पाएको छैन,” तकसेराका किसान बलबहादुर पुनले भने, “आधाभन्दा बढी स्याउ त कुहिएरै जान्छ ।”

रुकुममा यसवर्ष ३ हजार ६ सय टन स्याउ उत्पादन भएको जिल्ला कृषि विकास कार्यालयले जनाएको छ । बरिष्ठ कृषि विकास अधिकृत कुलप्रसाद अधिकारीले सात गाविसमा २ सय ७५ हेक्टर क्षेत्रफलमा स्याउ खेती हुने गरेको बताए ।

फलेको स्याउ बिक्री नहुँदा गाईभैसीलाई ख्वाउन र मदिरा उत्पादन गर्न प्रयोग भइरहेको पनि उनले जानकारी दिए ।
लक्ष्मण केसी, रुकुम

प्रतिकृया दिनुहोस