उग्रवादी संस्था ‘इंडियन मुजाहिद्दीन’ का संस्थापक, भारतीय प्रहरीको सर्वाधिक खोजीको सूचीमा रहेका यासीन भटकल नेपाल–बिहारको सीमा बेतिया नजिकबाट पक्राउ परेको भारतीय सञ्चारमाध्यमहरुले बताएका छन् ।

भारतीय गृह मंत्री सुशील कुमार शिंदेले भटकलको गिरफ्तारी पुष्टि गरेका छन् ।

भटकल भारतमा पक्राउ परेको सम्म आफूलाई थाहा भएको तर भारतीय भूमीमा भारतीय प्रहरीले पक्राउ गरेकाले यसबारे धेरै जानकारी नभएको नेपाल प्रहरीका प्रवक्ता नवराज सिलवालले वताए ।

उनले भने, “भटकल नेपालबाट पक्राउ परेको हैन, भारतमै पक्राउ परेको भन्नेसम्म हामीलाई जानकारी छ ।”

मुंबई पुलिसले १० र दिल्ली पुलिसले १५ लाख रुपैयाँको इनाम समेत राखेका भट्कललाई अमेरिकाले समेत आतंकवादीको सूचिमा राखेको छ ।

३० वर्षीय भटकलसँगै अर्का उग्रवादी असुदुल्लाह अख्तर पनि गिरफ्तार भएको भारतीय सञ्चारमाध्यमहरुले जनाएका छन् ।

भटकलले भारतको दिल्ली, जयपुर, बनारस, अहमदाबाद, सूरत, मुंबई, पुणे, हैदराबाद र बेंगलुरुमा भएका बम विष्फोटमा संलग्न भएको आरोप छ ।

टुंडाको बयानका आधारमा पक्राउ
३२ साउनमा महेन्द्रनगरको सीमावर्ती भारतीय बजार बनवासा क्षेत्रबाट पक्राउ परेका अब्दुल करीम टुंडाले दिएको बयानको आधारमा भटकललाई पक्राउ गरिएको बताइएको छ ।

टुंडाले भारतीय सुरक्षा निकायलाई भटकल बेला बेला नेपालमा बस्ने गरेको भन्दै  सीमा क्षेत्रमा उसका अड्डाहरुका बारेमा जानकारी दिएपछि भटकललाई पक्राउ गरिएको भारतीय टेलिभिजन आजतकले जनाएको छ ।

प्रतिकृया दिनुहोस