पार्टी मुख्यालय बल्खुमा १७ भदौमा सम्पन्न एमाले केन्द्रीय कमिटी बैठकले अध्यक्ष झलनाथ खनालले प्रस्तुत गरेको संविधानसभा निर्वाचन कार्ययोजनालाई सुझावसहित सर्वसम्मत रूपमा पारित गर्दै खनालकै नेतृत्वमा निर्वाचन परिचालन कमिटी गठन गरेको छ ।

निर्वाचन परिचालन कमिटीमा क्षेत्रीय अनुगमनकर्ताहरू क्रमशः उपाध्यक्षद्वय बामदेव गौतम (मध्य–पश्चिमाञ्चल तथा सुदूर पश्चिमाञ्चल), विद्या भण्डारी (पूर्वाञ्चल), सचिव द्वय युवराज ज्ञवाली (मध्यमाञ्चल), र शंकर पोखरेल (पश्चिमाञ्चल) सदस्य छन् ।

आसन्न संविधानसभा निर्वाचनमा आम राजनीतिक सहमति जुटाउन अन्तिम समयमसम्म पनि अधिकतम् प्रयत्न गर्ने निर्णय गर्दै बैठकले नेकपा–माओवादीलगायत असहमत दलहरूलाई लचिलो भएर वार्तामा आउन र संविधानसभा निर्वाचनमा सहभागी हुन पुनः आग्रह गरेको छ ।

यस्तै बैठकले अनेरास्ववियुको २१ औं राष्ट्रिय महाधिवेशनलाई व्यवस्थित रूपमा सम्पन्न गर्न सङ्गठन विभाग प्रमुख युवराज ज्ञवाली, मोर्चा सङ्गठन प्रमुख शंकर पोखरेल र विद्यार्थी फाँट प्रमुख भानुभक्त ढकाललाई जिम्मा दिने निर्णय गरेको छ ।

त्यसैगरी युवा संघ, नेपालभित्र उत्पन्न समस्या समाधान गर्न युवा फाँट प्रमुख शेरबहादुर तामाङ्, युवा सङ्घ नेपालका अध्यक्ष महेश बस्नेत र उपाध्यक्ष झपट रावललाई जिम्मेवारी दिने निर्णय पनि गरेको छ ।

यसअघि १७ भदौमै बसेको स्थायी कमिटीको बैठकले निर्वाचनका लागि उम्मेदवार तय गर्ने सम्बन्धमा निर्वाचन क्षेत्रको सिफारिसका आधारमा जिल्लामा सिफारिस गर्ने र जिल्लाको सिफारिसलाई अञ्चल कमिटीको रायसहित पार्टी केन्द्रीय कमिटीमा ल्याउने निर्णय गरेको थियो ।

यही भदौ १५ देखि शुरु बैठकको समापन गर्दै अध्यक्ष झलनाथ खनालले अब पार्टीको सम्पूर्ण ध्यान र ऊर्जा निर्वाचनको तयारीमा लगाउन, पार्टीभित्र पैदा हुनसक्ने सबै समस्यालाई सकारात्मक रूपमा समाधान गर्न तथा आसन्न संविधानसभाको निर्वाचनमा एमालेलाई बहुमत दिलाउन सिङ्गो पार्टी पंक्तिलाई एकताबद्व र क्रियाशील हुन आह्वान गरेको एमालेद्वारा जारी विज्ञप्तिमा उल्लेख छ ।

बैठकले केन्द्रीय निर्वाचन परिचालन कमिटीसँगै निर्वाचनसम्बन्धी घोषणापत्रको तयारीको नेतृत्व पनि अध्यक्ष खनालले गर्ने निर्णय गरेको छ ।

प्रतिकृया दिनुहोस