सुदूरपश्चिम भ्रमणमा रहेका एमाओवादी अध्यक्ष पुष्पकमल दाहालले धनगढीमा आयोजित कार्यक्रममा कैलाली–कञ्चनपुरलाई अलग राज्यमा राख्नु पर्ने अभिव्यक्ति दिएको भन्दै अखण्ड सुदूरपश्चिम पार्टी कञ्चनपुरका कार्यकर्ताले पुत्ला दहन गरेका छन् ।

२२ भदौ साँझ असुपा कञ्चनपुरका अध्यक्ष अम्बादत्त जोशी र सचिव जयराज जोशीको नेतृत्वमा भएको प्रदर्शनमा महेन्द्रनगरको मदन चोकमा दाहालको पुत्ला दहन गरिएको हो । प्रदर्शनकारीहरुले दाहालकाविरुद्ध चर्को नाराबाजी समेत गरेका थिए ।

यसैबीच महाकाली पारीको दोधारा–चाँदनी पुगेका एमाओवादी अध्यक्ष दाहालले जनभावना अनुसारको संविधान निर्माणका लागि एमाओवादीको स्पष्ट बहुमत आउनु पर्ने दाबी गरेका छन् ।

पूर्व सांसद मानबहादुर सुनार, इन्द्रबहादुर खत्री लगायतका व्यक्तिहरुलाई पार्टी प्रवेश गराउँदै अध्यक्ष दाहालले ४ मंसीरमा जसरी भए पनि संविधानसभा निर्वाचन हुने बताए । उनले महाकाली नदीमा पक्की तटवन्ध, सुख्खा वन्दरगाह निर्माण लगायतका कामहरु गर्ने आश्वासन पनि दिए ।

एमाओवादी अध्यक्ष दाहाल तथा नेताहरु बाबुराम भट्टराई, पोष्टवहादुर बोगटी, हरिवोल गजुरेललगायतले बाढीग्रस्त क्षेत्रको निरीक्षण  गरेका थिए ।

बच्चु विक, महेन्द्रनगर

प्रतिकृया दिनुहोस